Жамбыл облысында дәрігерлердің салғырттығынан 6 жастағы бала ажал құшты

Жамбыл облысы Тұрар Рысқұлов ауданы Құлан ауылында 6 жастағы Әли Еламанұлы көз жұмды. Туыстары баланың өліміне дәрігерлерді кінәлап отыр. Олар Денсаулық сақтау министрлігі мен Қасым-Жомарт Тоқаевтан көмек сұрады, деп хабарлайды Orda.kz. 

Әлеуметтік желіде марқұм баланың туыстары бейнежазба жариялады. Олар дәрігерлердің салғырттығынан 2019 жылы туған баладан айырылып қалғанын, ал 2 жыл бұрын осы ауруханада баланың анасы көз жұмғанын мәлімдеді. 

Бүлдіршін 29 қыркүйектен бастап ауырған екен. Учаскелік дәрігер ешқандай көмек көрсетпей, үйіне қайтарып жіберген. Бірақ баланың беті бері қарамай 7 қазанда ауданның орталық ауруханасына жатқызылған. Бірақ алғашқы күндері ауруханада да ешқандай ем-дом шаралары жасалмаған. Дәрігерлер дұрыс қарамаған. Баланың туыстары ауырсыну басылмаған соң, балаға тек «Креон» дәрісін бергенін айтты. Бүлдіршін 10 қазанда көз жұмды. 

Бейне авторы баланың бір апта бойы қиналғанын айтып жылады. 

Жамбыл облысы полиция департаменті «Кәмелетке толмаған баланың қайтыс болу фактісі» бойынша Т. Рысқұлов ауданының орталық ауруханасына тергеу жұмыстарын бастады.

Айта кетейік, Шымкентте де дәрігерлердің немқұрайлығынан 28 жастағы келіншек босанғаннан кейін көз жұмды.