Жамбыл облысы Сарысу ауданында төтенше жағдай жарияланды

Қатты дауыл салдарынан Жамбыл облысының Сарысу ауданында төтенше жағдай режимі жарияланды, деп хабарлайды Orda.kz.       

Табиғи апат салдарынан бірқатар ғимараттарға зақым келді. Қазіргі уақытта келтірілген шығын көлемі есептеліп жатыр.

Облыстық әкімдік дауыл Жаңатас қаласындағы тұрғын үйлердің шатырларын жел ұшырып әкеткенін растады. Сонымен қатар, электр желілері үзілген.

Оқиға орнына Жамбыл облысының әкімі Ербол Қарашөкеев барды.

«Үш тұрғын үйдің шатыры толықтай ұшып кеткен, тағы жеті үйдің шатыры жартылай зақымданды. Сондай-ақ жеті кәсіпкерлік нысанға зиян келді. Ұзындығы 2 шақырым болатын электр желісі істен шықты. Зардап шеккендер жоқ. Коммуналдық қызметтер штаттық режимде жұмыс істеп жатыр, әлеуметтік нысандарға залал келген жоқ» деп жазды әкім әлеуметтік желідегі парақшасында. 

Қарашөкеевтің айтуынша, қазіргі таңда келтірілген шығынды бағалау жұмыстары жүргізілуде. Ол тұрғындар мен кәсіпкерлерге қажетті көмек көрсетілетініне уәде берді.

Еске салсақ, 6 ақпанда Жамбыл облысы Жаңатас қаласында қатты жел салдарынан бірнеше тұрғын үйдің шатырлары зақымданып, қалада электр жарығы өшірілгенін жазғанбыз.

Оқи отырыңыз:

• Президент конституциялық комиссия жетекшілерін қабылдады
• Әбу-Дабиде Украина мен Ресей арасындағы соғысты тоқтатуға алғашқы қадам жасалды
• Күре жолдар жабылды: Қазақстанның 16 облысында дауылды ескерту жарияланды