Үйге қамап, қонаққа кеткен: СҚО-да өрттен қаза тапқан қыздың анасы қамауға алынды

СҚО-да өрттен қаза тапқан қыздың  33 жастағы анасы баласын қауіпті жағдайда қалдырды деген күдікке ілінді. Оған қатысты қылмыстық іс қозғалды, деп хабарлайды Orda.kz.

«Қыз баланың анасы қамауға алынды. Заңға сәйкес, оған үш жылға дейін бас бостандығын шектеу немесе бас бостандығынан айыру жазасы қаупі төніп тұр»,  деп хабарлады Солтүстік Қазақстан облыстық полиция департаменті. 

Еске салайық, қайғылы оқиға 18 қаңтар күні кешке Ольшанка ауылында болған. Жеке тұрғын үйде өрт шыққан. Сол сәтте үйдің ішінде бес жасар қыз бала болған. Тергеу деректеріне сәйкес, әйел баласын үйде жалғыз қалдырып, қонаққа кеткен.

Өрт сөндірушілер оқиға орнына жеткен кезде үйді түгелдей от шарпыған, ал шатыр опырылып түскен. Қыз баланың мәйіті үйінді астынан табылды. Өкінішке қарай, оны құтқару мүмкін болмады. Қазіргі уақытта тергеушілер өрттің шығу себептері мен қайғылы жағдайдың барлық мән-жайын анықтап жатыр.

Бұған дейін Павлодар облысының Ертіс ауылында төрт баласы бар үйдің өртенгені туралы жазған едік. 2018 және 2021 жылдары туған екі сәби ауруханада көз жұмды, үшінші бала жансақтау бөлімінде жатыр. Ал бір бала өздігінен сыртқа шығып үлгерген. Қайғылы оқиға кезінде анасы жұмыста болған.

 Еске салсақ, былтыр да Солтүстік Қазақстан облысының Ступинка ауылында жеке үй өртеніп, үш бала мен екі ересек адам қаза тапқан болатын.

Оқи отырыңыз:

• СҚО-да алты бірдей әкім қоқыс үйінділері үшін айыппұл төледі
• Солтүстік Қазақстанда жол апатынан төрт адам қаза тапты
• «Кеше сүндет той, бүгін жаназа»: Алғабаста 12 адамды жалмаған өрттен аман қалуға мүмкіндік болды ма?