ҰБТ-да талапкерлердің 77 пайызы шекті балл жинады

Ғылым және жоғары білім министрлігі ҰБТ-ның аралық нәтижелерін жариялады. Алматы облысынан келген талапкер ең жоғары 140 балл жинады, - деп хабарлайды Orda.kz   министрлікке сілтеме жасап.

Негізгі ҰБТ басталғалы 264 мың рет тестілеу өткізілді. Оның ішінде талапкерлердің 75 пайызы қазақ тілінде, 25 пайызы орыс тілінде емтихан тапсырған. 197 адам ағылшын тілін таңдады.

ҰБТ басталғалы бері талапкерлердің 77 пайызы шекті балл жинаған. Орташа балл 69 болды.

«ҰБТ-ның алтыншы аптасында Алматы облысының түлегі ең жоғары 140 балды жинады. Кеше, 27 маусымда Алматы облысының Есік қаласында талапкер ҰБТ-ны математика-информатика комбинациясы бойынша тапсырды. 5 адам 138 балл жинады. ҰБТ қорытындысы бойынша соңғы рет 2021 жылы Павлодар облысынан, 2018 жылы Алматы қаласынан келген талапкер 140 балл жинағанын еске саламыз»  делінген хабарламада.

Ең жоғары балл жинаған – Алматы облысы Талғар ауданы Қарабұлақ ауылының №22 орта мектебінің түлегі Жаннұр Еңсебек болды.

Ерекше білім беруді қажет ететін талапкерлерге қолайлы жағдай жасалғанның арқасында алты апта ішінде осындай 620 талапкер ҰБТ-ға қатысты.