Тоқаев Михаил Шайдоровты «Барыс» орденімен марапаттады

14 ақпан күні таңертең мемлекет басшысы Қасым-Жомарт Тоқаев Михаил Шайдоровты қысқы Олимпиада ойындарының чемпионы атануымен құттықтап, оны «Барыс» орденінің II дәрежесімен марапаттау туралы шешім қабылдады, деп хабарлайды Orda.kz.

Құттықтауында президент отандық спорт тарихында мәнерлеп сырғанаудан тұңғыш рет жеңіп алған алтын медальдің тарихи маңызы зор екенін атап өтті. Мемлекет басшысы Михаил Шайдоровқа жоғары шеберлігі мен жеңіске деген жігері үшін алғыс білдірді. Бұл туралы президенттің кеңесшісі — баспасөз хатшысы Айбек Смадияр өзінің Telegram-арнасында мәлімдеді.

Қасым-Жомарт Тоқаев қазақстандық спорт жанкүйерлері мен ел азаматтары спортшымыздың осы айтулы жетістігін зор мақтанышпен қабылдағанын ерекше атап өтті. Сондай-ақ Мемлекет басшысы атқарылған жұмыс үшін бапкерлер құрамына және салалық министрлік басшылығына ризашылығын білдірді.

Еске салсақ, мәнерлеп сырғанаушы Михаил Шайдоров Қазақстан қоржынына Олимпиада ойындарындағы тұңғыш алтын медаль салған болатын.

Оқи отырыңыз:

• Италияда Қысқы Олимпиада-2026 ойындарының ашылу салтанаты өтті
• Қазақстан 2026 жылғы қысқы Олимпиадаға 36 спортшы жібереді
• Азия чемпионаты–2026: Ел қоржынына жеңіл атлетикадан алғашқы медаль түсті