Тоқаев Қытай елшісін «Достық» II дәрежелі орденімен марапаттады

Қазақстан Президенті Қасым-Жомарт Тоқаев Қытай Халық Республикасының елшісі Чжан Сяоны «Достық» II дәрежелі орденімен марапаттап, екі ел арасындағы достықты нығайту мен стратегиялық серіктестікті дамытуға қосқан ерекше үлесін жоғары бағалады, деп хабарлайды Orda.kz.

Марапаттау рәсімі барысында Мемлекет басшысы Қазақстан мен Қытайды «берік достық пен тату көршілік қарым-қатынастар» біріктіретінін атап өтті.

Тоқаевтың айтуынша, екі ел арасындағы қарым-қатынас бүгінгі таңда жан-жақты дамып, саяси диалогтың қарқындылығымен, экономикалық ынтымақтастықтың нығаюымен және мәдени алмасулардың артуымен ерекшеленеді. Сонымен қатар, білім беру бағдарламалары мен ғылыми жобалар саны ұлғайып, қауіпсіздік саласында, әсіресе «үш зұлым күшпен» күресте тығыз байланыс орнаған.

Президент сондай-ақ Қазақстан мен Қытайдың халықаралық аренадағы рөлін атап өтті. Екі мемлекет БҰҰ, ШЫҰ, АӨСШК секілді ұйымдар аясында, сондай-ақ «Орталық Азия – Қытай» форматында бірлесе жұмыс істеп келеді. 

Марапатты қабылдаған Чжан Сяо Қазақстан Президентіне ризашылығын білдіріп, Қытай тарапының жан-жақты серіктестікті одан әрі дамытуға бейілді екенін жеткізді.

Еске сала кетсек, Orda.kz Қытайдағы қазақтар жайлы және «қайта тәрбиелеу» орталықтарында отырып шыққан қазақтар жайлы жазған болатын.