Сыбайлас жемқорлық қылмыстарына күдікті кеден қызметкері Испаниядан Қазақстанға экстрадицияланды

Қазақстан Республикасының Бас прокуратурасы мен ҰҚК Сыбайлас жемқорлыққа қарсы іс-қимыл қызметі Испания Корольдігіндегі Қазақстан елшілігінің қолдауымен Барселона қаласынан лауазымдық өкілеттігін теріс пайдаланды және қызметтік қылмыс жасады деген күдікке ілінген Қазақстан азаматын экстрадициялады. Бұл туралы Бас прокуратураға сілтеме жасап Orda.kz хабарлайды.

Ол 2020 жылы кеден органы қызметкері болған кезінде ақпараттық базаға жалған мәліметтер енгізу арқылы сегіз автокөлік иесін кедендік баж салығын төлеуден заңсыз босатқан деген күдікке алынып отыр. Нәтижесінде мемлекет бюджетіне келтірілген шығын 45 миллион теңгеден асқан.

Аталған тұлға үш жылдан астам уақыт бойы қылмыстық қудалау органдарынан бой тасалап, халықаралық іздеуде болған. Кейін ол Испания аумағында ұсталған.

Қазіргі уақытта күдікті Астана қаласындағы тергеу изоляторына қамауға алынды. Оған тағылған қылмыстар үшін жеті жылға дейін бас бостандығынан айыру, мүлкін тәркілеу, сондай-ақ белгілі бір лауазымдарды атқару немесе белгілі бір қызметпен айналысу құқығынан өмір бойына айыру жазасы көзделген.

Дәл осылай Швеция билігі Қазақстанға жалған шетелдік банкноттарды ірі көлемде сатты деген күдікті әйелді экстрадициялады. Тергеушілердің мәліметінше, күдікті 2019 жылдың желтоқсаны мен 2020 жылдың қаңтары аралығында Қазақстандағы банктердің бірінің қызметкерлерінің көмегімен жалған еуро банкноттарын заңсыз айырбастаған.

Тақырыпқа сай ұсынамыз:

• Тұтқындағы дауыс: Ирак түрмесіндегі алты әйел Қазақстан билігінен көмек сұрайды
• Ақжарқын Тұрлыбайды қайтару үшін Нигерия азаматын экстрадициялау жолдары қарастырылып жатыр
• Алдап алып кетті: Күйеуі Дина Таңсәрі қалай ұсталғанын айтып берді
• Германияға қашқан прокурор Дүйсеновтің қолында қандай маңызды дерек бар?