Шерхан Қалмырза деген кім және ол әлемді өзіне қалай қаратты?

«Қайраттың» 18 жастағы қақпашысы «Реалға» қарсы матчтан кейін қалай танымал болғанын Orda.kz  саралап көрді.

Тарихи матчқа дейін Шерхан Қалмырзаны тек «Қайраттың» жанкүйерлері ғана білетін. Ал бүгін 18 жастағы қақпашының есімі бүкіл Еуропада аталып жатыр. УЕФА оның сейвтерін қатарынан екінші рет Чемпиондар лигасындағы үздіктер қатарына қосты.

Мадридтің «Реалына» қарсы өткен ойында Шерхан нағыз шеберлігін көрсетті. Килиан Мбаппе қақпаға соққы жасаған сәтте есепті испандар еселейді деп ойлағандар көп болды. Алайда Қалмырза секіріп, әлемдік футбол жұлдызының соққысын қайтарып, команданы құтқарып қалды. 

«Қайраттың» 0:5 есебімен жеңілгеніне қарамастан, дәл осы эпизод ең көп талқыланған сәттердің біріне айналды. Турнирдің инстаграм парақшасында үздік сейвке дауыс беру жүріп жатыр, ал қазақстандық қақпашы — басты фавориттердің бірі.

Тарихтағы ең жас қақпашы

Айта кетерлігі, бұл — Шерхан үшін УЕФА-дан қатарынан екінші мәрте түскен номинация. Чемпиондар лигасының алғашқы турында ол Лиссабонның «Спортинг» клубының капитаны тепкен пенальтиді қайтарғаннан кейін үздіктер қатарына енген еді. Сол кезде ол турнир тарихындағы дебют жасаған ең жас қақпашы атанды.

Қалмырзаға тәжірибелі Александр Заруцкий мен Темірлан Анарбеков сынды қақпашылардың жарақатына байланысты мүмкіндік берілді. Оның «Қайраттағы» алғашқы ойыны небәрі бірнеше апта бұрын, 14 қыркүйекте өтті. Ол «Ақтөбеге» қарсы матчта алаңға қосылып, аз уақыттан соң бүкіл елдің қаһарманына айналды.

«Реалға» қарсы кездесуден кейін жас қазақстандыққа әлемнің үздік қақпашыларының бірі саналатын Тибо Куртуа арнайы келіп, қолдау білдірді. Олар жейделерін бір-біріне естелік ретінде берді. Бельгиялық қақпашы тіпті бірге түскен суретті әлеуметтік желіге жариялап, әріптесін қолдады. Кез келген футболшы үшін мұндай қадам кәсіби деңгейді мойындауды білдіреді.

Жанкүйерлердің қолдауы және Шерхан Қалмырзаның жеке өмірі

Қазақстандық жанкүйерлер Шерханға ерекше тәнті болды. Бүгінде ол туралы бүкіл ел айтып жатыр.

«Қалмырза, жарайсың, Қазақстанның мақтанышы! Ол тағы да нағыз қақпашы екенін дәлелдеді», – деп жазады Қазнет қолданушылары.

Алайда Қалмырзаға деген қызығушылық тек футбол алаңымен шектеліп қалған жоқ. Журналистер Шерханның Қазақстанның ең атақты футболшысы Самат Смақовтың қызы Самирамен кездесіп жүргенін анықтады. Қыз жігіттен екі жас үлкен, жұп болғандарына қазір бір жарым жыл болған.

Шерханның анасы Сәуле Рабаева да көпшіліктің назарын өзіне аударды. Әлеуметтік желі қолданушылары оның жас әрі сұлу екенін және харизмасын айтып, ұлын тәрбиелегені үшін алғыс білдіріп жатыр.

Алда «Қайратты» өз алаңында тағы бір Чемпиондар лигасының ойыны күтіп тұр. Матч 21 қазанда Кипрдің «Пафосына» қарсы өтеді. Енді көпшілік бұл сайысты тек команда үшін емес, Шерхан Қалмырзаны алаңда көру үшін де асыға күтетін болды. Бұл енді ғана 18 жасқа келген дарынды жігіттің үлкен жолға шыққан бір соқпағы десек артық айтқандық болмас.

Автор: Руслан Логинов