Министрлік Баян Алагөзованың «Қыз Жібек» фильміндегі киімге қатысты жариялаған жазбасына пікір білдірді

Мәдениет және ақпарат министрлігі әлеуметтік желілерде талқыланып жатқан продюсер Баян Алагөзованың «Қыз Жібек» фильміндегі киіміне қатысты жариялаған жазбасына қатысты пікір білдірді, деп хабарлайды Orda.kz.       

Мәдениет және ақпарат министрлігі «Қазақфильм» киностудиясының музей қорында «Қыз Жібек» фильмінде пайдаланылған бір камзолдың түпнұсқасы сақтаулы тұрғанын мәлімдеді.

Министрлік мәлімдегендей,  «Қазақфильм» киностудиясы ұлттық фильмдерде пайдаланылған құнды реквизиттерді, костюмдер мен басқа да тарихи маңызы бар заттарды жүйелі түрде жинақтап, қалпына келтіру және сақтау жұмыстарын жүргізіп отырады.

Бұл бағыттағы жұмыс ұлттық мәдени мұраны келешек ұрпаққа жеткізуге бағытталған.

Министрлік мәдени құндылықтарды сақтау және қорғау мәселесіне ерекше мән беретінін, сондай-ақ қоғамда туындаған сұрақтарға ашық әрі нақты ақпарат беруге әрдайым дайын екенін атап өтті.

Еске салсақ, Баян Алагөзова өзінің әлеуметтік желідегі парақшасында көпшілікті таңғалдырған ерекше жаңалығымен бөліскен болатын. Ол қазақ кино өнерінің алтын қорына енген «Қыз Жібек» фильмінде Меруерт Өтекешова киген түпнұсқа қамзолға ие болғанын айтып, мақтанды.

Продюсер бұл жәдігерді өзінің гардеробындағы ең қымбат әрі құнды дүние деп есептейтінін, өйткені 50 жылдан астам тарихы бар бұл киім — аңызға айналған суретші Гүлфайрус Исмаилованың қолынан шыққан бірегей туынды екенін айтқан болатын.

Оқи отырыңыз:

• Баян Алагөзова Қазақстанның еңбек сіңірген қайраткері атағын алды
• Баян Алагөзова: Радикализм, «Алтын Ханым» және әл-Фарабидегі апаттар
• Баян Алагөзова әйелдерге де бірнеше күйеуге шығу құқығын заңдастыруды ұсынды