«Қыз үшін сыныптасын соққыға жықты»: Астанада оқушының үстінен әкімшілік іс қозғалды

Астанада жасөспірім қатарласын соққыға жықты. Оқушының мұндай әрекетке баруына бір қыз себеп болған, деп хабарлайды Orda.kz. 

Астана қалалық полиция департаменті оқиғаның «Мечта» тұрғын үй кешенінде болғанын мәлімдеді. Тұрғын үй №71 мектептің жанында орналасқан. Полиция тексеру барысында жанжалдасқандардың бәрін анықтады. 

Жасөспірімдердің бірі қызға жақтасқаны белгілі болды. Оның сөздері қатарласына ұнамай, екеуі жанжалдасқан. Кейін жанжал соңы төбелеске ұласты. 

Кәмелетке толмағандарға қатысты қоғамдық орында бұзақылық фактісі бойынша әкімшілік іс қозғалды. Іс материалдары саралану үшін сотқа жіберілді.

Айта кетейік, бүгін, 10 қазан күні Қостанай облысында Абылайхан Саринжиповке қатысты үкім шығарылды. Ол облыстық аурухананың уролог-хирургі Антон Кистановты ұрып өлтіріп қоя жаздады.