Көптен күткен Зеленский мен Трамптың кездесуі 28 желтоқсанда өтеді

Зеленскийдің кеңсесі оның Трамппен кездесуі 28 желтоқсанда Флоридада өтетінін растады, деп хабарлайды Orda.kz DW-ге сілтеме жасай отырып.

Украина бойынша 20 тармақтан тұратын бейбіт жоспар қазірдің өзінде 90 пайызға дайын. Бұл туралы жұма, 26 желтоқсанда Украина президенті журналистермен онлайн-сөйлесу кезінде мәлімдеді.

Украина көшбасшысының айтуынша, 28 желтоқсанға жоспарланған АҚШ президенті Дональд Трамппен кездесу барысында ол Киевке қауіпсіздік кепілдіктеріне байланысты құжаттар топтамасын талқылауға ниетті.

Владимир Зеленский сондай-ақ Украинада президенттік сайлау мен референдум өткізу бойынша заңнамалық бастамалар бар екенін, осыған байланысты қауіпсіздікті қамтамасыз ету басты мәселе болып қалатынын атап өтті.

Украина президенті келіссөздерге қатысатын барлық төрт тараптың - Украина, АҚШ, Ресей және Еуроодақтың келісімінсіз түпкілікті бейбіт шартқа қол қоюға болмайтынын айтты.

2025 жылы Владимир Зеленский Ақ үй басшысымен келіссөз жүргізу үшін АҚШ-қа үш рет барды, соңғысы  - 17 қазанда.

Естеріңізге сала кетейік, Украина Президенті Владимир Зеленский Нью-Йоркте өткен БҰҰ Бас Ассамблеясы барысында Дональд Трамппен өткен жабық кездесуі кезінде ұзақ қашықтыққа ұшатын Tomahawk қанатты зымырандарын беруді сұрады, бірақ Трамп бас тартты.

Бұған дейін Зеленский Трамптың Украина жөніндегі бейбіт жоспарының мазмұнын жариялаған болатын.