Әкімдерді сайлауға 17 млрд теңге қажет

Мәжілісте Қазақстандағы «сайлау туралы» Конституциялық заңға түзетулер жобасы мен оған ілеспе заң жобасы қаралуда. 800 әкімнің сайлауына 17,6 миллиард теңге қажет болады. Бұл туралы Ұлттық экономика вице-министрі Әлішер Әбдіқадыров мәлімдеді.

Заң жобасында аудандық маңызы бар қалалар, ауылдар, кенттер, ауылдық округтер әкімдерінің сайлауын енгізу көзделген.

67 түзету енгізу ұсынылады: сайлауды тағайындау, кандидаттарды ұсыну, тіркеу, сайлауды өткізу, қалалардың, аудандық маңызы бар қалалардың, ауылдардың, кенттердің, ауылдық округтердің әкімдерін тіркеу тәртібін белгілеу; кандидаттарға қойылатын талаптар; ұсыну тәсілдері; сайлауды өткізу кезеңдерінің мерзімдері, сондай-ақ кандидаттарды қолдауға қол жинау, дауыстарды санау.

— Әкімдердің тікелей сайлауын қаржыландыру жергілікті бюджеттер арқылы жүзеге асырылатын болады. Алайда, Бюджет кодексінің жалпы сипаттағы трансферттердің қолданылу кезеңінде жергілікті бюджеттің шығындарын міндетті өтеу туралы нормаларын ескере отырып, таяудағы екі жылда сайлау ОСК арқылы қаржыландырылатын болады. 2023 жылдан бастап бұл шығыстар жергілікті бюджеттердің шығыстар базасына енгізіліп, жалпы сипаттағы трансферттерде есептеу кезінде ескерілетін болады.

Бұл шамамен 17,6 миллиард теңге, оның 4,8 миллиард теңгесі биыл 800 - ден астам әкімнің сайлауын өткізуге жұмсалады, - деп түсіндірді Әлішер Әбдіқадыров.