Қазақстанның павильоны Жапониядағы EXPO-да бірінші орын алды

Жапонияның Осака қаласында өткен EXPO 2025 Osaka дүниежүзілік көрмесінде еліміздің павильоны бірінші орын алды, деп хабарлайды Orda.kz.

Жапониядағы EXPO Awards марапаттау рәсімі 12 қазанда өтті. Шарада Қазақстан павильоны шағын павильондар арасындағы Theme Development («Көрме тақырыбын ашу») номинациясында бірінші орынды иеленді. 

Көрме ашылған күннен бастап Қазақстан павильоны жапон және шетелдік туристер арасында ерекше танымал болды. Мұнда келушілер еліміздің мәдениеті, дәстүрі, тарихы, инвестициялық және инновациялық әлеуеті, сондай-ақ цифрландыру мен тұрақты даму саласындағы жетістіктерімен танысты.

Жапон және халықаралық БАҚ Қазақстан павильоны туралы бірқатар мақалалар жариялап, оның мазмұны мен дизайнын ерекше атап өтті. 

EXPO 2025 Osaka көрмесіндегі ең маңызды оқиғалардың бірі – Қазақстанның Ұлттық күні болды. Бұл мереке 10 тамызда ұлы ойшыл Абай Құнанбайұлының 180 жылдығына арналған. Сол күні EXPO-ның National Day Hall сахнасында Қазақстан Республикасының туы көтеріліп, шамамен үш мыңға жуық адам қатысқан мерекелік бағдарлама ұйымдастырылды.

Көрме өткен алты ай ішінде Қазақстан павильонын 1,5 миллионнан астам адам тамашалады. Қонақтардың арасында ресми делегациялар, халықаралық ұйымдар мен дипломатиялық миссиялардың өкілдері, сондай-ақ түрлі елдерден келген журналистер болды.

Айта кетейік, Қазақстанда Алматы облыстық соты ұлттық «Астана ЭКСПО — 2017» компаниясының бұрынғы басшысы Талғат Ермегияевтің апелляциялық шағымын қарады. Сот оны мерзімінен бұрын босатудан бас тартты.