«Қайрат Сатыбалдымен арамыз жақсы»: Мұхамеджан Тазабек Қаңтар оқиғасы кезінде қайда болды?

23 мамыр 2025 12:00 Альфия Адамбек

Фото: Бейнеден кадр

Мұхамеджан Тазабек Қаңтар оқиғасы кезінде қайда болғанын, Қайрат Сатыбалдымен қазір қарым-қатынасы қандай екенін айтты, деп хабарлайды Orda.kz.

Мұхамеджан Тазабек «Уақыт көрсетеді» YouTube арнасына келіп, Нұрсейіт Жылқышыбайға сұхбат берді.

Журналист Нұрсейіт Жылқышыбай «Ағаңыз Қайрат Сатыбалдының қазіргі жағдайы қалай?» деп сұрақ қойды.

«Жақсы. Анасы қайтыс болғанда көңіл айтып кіріп шықтық. Енді иманды адам ғой. Ер басына не келіп, не кетпейді. Өзінің шаруасын атқарып жүр. Мәселесі түбегейлі шешіліп біткен жоқ. Тойға келмеді. Қазір ол кісі той-томалаққа барып жүрген жоқ», — деді Мұхамеджан Тазабек.

Журналист Мұхамеджан Тазабектен Қайрат Сатыбалды қамалғанда әлеуметтік желідегі бірге түскен суреттерді неге өшіріп тастағанын сұрады.

«Үш сурет болды. Соның біреуін өшірдім. Қолайсыздау суреттері болды, соны алып тастадым. Жоғарыдан ешқандай бұйрық келген жоқ», — деді ол.

Нұрсейіт Жылқышыбай Мұхамеджан Тазабектің Қаңтар оқиғасы кезінде үнсіз қалғанын алға тартты. Халықтың да осы үшін ренжулі екенін айтты.

«Қаңтардан кейін қоғамда дүрбелең болды. Адамдарда психологиялық толқындар болды. Сондықтан ол жерде әділ пікір болды деп ойламаймын. Әркім туралы әртүрлі әңгіме айтылды. Бірақ мен үнсіз қалмадым. «Асыл арнада» Ерлан Әбдірұлы екеуіміз «Сіз қаңтарда қайда болдыңыз?» деген сұхбат жасадық. Сол жерде толық жауап бердім. Ал Қаңтар оқиғасы кезінде Алматыда болдым. Бір күннен кейін Есікке бардым. Кейін Түркияға сапарым бар еді, бір аптаға Түркияға барып келдім», — дейді ол.

Журналист «Қаңтар оқиғасы кезінде нақты Алматыда болдыңыз ба? Сізді Бішкектен көргендер бар екен» деген сауал қойды.

«Алматының әуежайы жабық болғандықтан, Бішкек арқылы ұштым», — деп жауап берді Мұхамеджан Тазабек.

Айта кетейік, Қайрат Сатыбалды іргесін қалаған медресеге жыл сайын бюджеттен 200 млн теңге құйылатыны белгілі болды.

Жаңалықтар

барлық жаңалықтар