«Қайрат» пен «Селтик»: Алматыда алғаш рет Чемпиондар лигасының әнұраны шырқалады

Алматылық «Қайрат» Чемпиондар лигасы іріктеуінің плей-офф кезеңінде «Селтикке» қарсы матч алдында баспасөз мәслихатын өткізді, деп хабарлайды Orda.kz.

Жиынға бас бапкер Рафаэль Уразбахтин мен жартылай қорғаушы, команда капитаны Әділет Садыбеков қатысты.

Ертең тарихи сәт болғалы тұр: алғаш рет Алматыда Чемпиондар лигасының әнұраны шырқалады. Бұл жергілікті футбол үшін және жанкүйерлер үшін маңызды оқиға.

Журналистер бас бапкерден командадағы кадрлық мәселелерді қалай шешкенін сұрады.

«Иә, өкінішке қарай, кадрлық мәселелер бар. Қатыспайтын ойыншылардың ойында орындары жетіспейтіні анық. Дегенмен, олардың орнын басатын ойыншыларға өздерін көрсетуге мүмкіндік туады деп үміттенеміз. Ал нақты кіммен алмастыруға болатынын біз қазірдің өзінде анықтап қойдық», – деді Уразбахтин.

Сонымен қатар, бұл ойында команданың жас жұлдызы  Дастан Сәтпаев алаңға шықпайды. Бұған байланысты оның көңіл-күйін білдік. Еске сала кетейік, өткен ойында Сәтпаев сары қағаз алып, бір ойынға шеттетілген еді.

«Дастан осы жолғы ойынға қатыспайтынына қатты уайымдады. Менің білуімше, ол тіпті екі күн бойы ешкіммен сөйлеспеді. Біз өз тарапымыздан оны барынша қолдап жатырмыз. Ол әлі жас ойыншы, түрлі жағдайлар болуы мүмкін. Сондықтан бұған оның кезекті тәжірибесі деп қараймыз. Әрине, Сәтпаевтың осы ойында жоқтығы біз үшін үлкен шығын», – деді бас бапкер.

Сонымен қатар, Уразбахтин өткен ойында «Селтик» «Қайратты» бағаламағанын атап өтті.

«Бұл жолы Селтикке қысым көбірек деп ойламаймын. Мүмкін, Глазгода олар бізді сәл бағаламаған шығар, бірақ енді басқа мотивациямен келеді. Дегенмен, біздің бағытымыз анық», – деді Рафаэль Уразбахтин.

Еске салсақ, алматылық «Қайрат» Глазгода шотландиялық «Селтикпен» плей-офф матчында 0:0 тең есеппен ойнап, сенсация жасады. Ойын «Селтик Парк» стадионында өтті. Жауапты ойыны 26 тамызда Алматыда өтеді.