Кәсіпкерлер алкоголь сату лицензиясы ережелерін өзгертуді сұрайды

Елордалық кәсіпкерлер алкоголь өнімдерін сату үшін лицензиялық алымды төлеу тәртібін өзгертуді сұрайды, деп хабарлайды «Атамекен» Ұлттық Кәсіпкерлер палатасының сайты.

«Бизнесті заңды қорғау» ҚБ басшысы Әмина Әбденова Салық кодексінің 557-бабына сәйкес, елордада алкоголь өнімдерін сататын ірі, орта және шағын бизнес субъектілері әрбір нысан үшін кәсіпорынның өлшемділігі бойынша градациясыз 100 АЕК төлейтінін атап өтті.

— Бұл дұрыс емес, өйткені ірі супермаркеттердің алкоголь өнімдерін сатуы жай дүкендердердегі сатудан біраз ерекшеленеді. Микробизнес зардап шегеді. Жай дүкендерде алкоголь сатудан түскен түсім лицензия құнын өтемейді. Мысалы, бізге сыра 219 теңгеден, сауда үйінде ол 199 теңгеден сатылады. Күніне 50 м2 дейінгі дүкен тіпті 1,5 литр алкогольді сата алмайды. Күніне орта есеппен бір жарым қорап сатамыз. Осылайша біз шығынға батамыз, - деді ол.

«Бизнесті заңды қорғау» ҚБ-ға 560 дүкен кіреді. Әмина Әбденованың айтуынша, осы жылдың ішінде 140-қа жуық үй жанындағы дүкен жабылуға мәжбүр болған.

Кәсіпкерлер Салық кодексіне өзгерістер мен толықтырулар енгізуді, кәсіпорынның мөлшері бойынша алкоголь өнімін сатуға мөлшерлемелерді градациялауды қарастыруды ұсынды. Бұл ретте Микробизнес үшін ол 40 АЕК-тен аспауы тиіс. Олар сонымен қатар сыра лицензияланатын өнім түрлеріне жатпайтын Ресейдің тәжірибесін қолдануды ұсынды.

— Бұл мәселені шешу лицензиялық алымның жоғары болуына байланысты алкогольді заңды түрде сата алмайтын шағын дүкендерді көлеңкеден шығаруға мүмкіндік береді. Сондай – ақ, бұл микробизнеске қаржылық жүктемені азайтар еді, бұл қабылданған карантиндік шаралар жағдайында маңызды, - деп атап өтті Нұр-Сұлтан кәсіпкерлер палатасы директорының орынбасары Бейсен Жолболдиев.

Ол бұл мәселені республикалық деңгейде қарастыру үшін кедергілер картасына енгізуді ұсынды.