Үйімді тартып алды: Алматыда ипотекаға үй алғандар наразылыққа шықты

Бүгін «Қазақстан Республикасының қаржы нарығын реттеу және дамыту агенттігінің» алдында он бес шақты адам жиналып, өздерінің наразылықтарын білдірді.

Жиналған топтың айтуынша, ипотекаға үй алғандардың төлемді уақытылы төлемеуіне байланысты үйлерінен шығарып жіберген. Кейбірінің үйін банк өз атына заңдастырып алғаны да айтылды. Жиналғандар арасында 2016, 2017, 2020 жылы үйінен айрылған азаматтар бар. Олардың кейбірі мүмкіндігі шектеулі жандар. Олар банктің бұл әрекетін заңсыз деп санайды.

Үйінен айрылғандардың бірі Гүлбақыш Рақымжанқызының айтуынша, ол 2006 жылы ипотека алған. Ипотеканы төлей алмау себебінен өзінің үйінен айрылған. Қазір өзі үйде тұрып жатқанмен, пәтер банктің атында қалған.

– 2007 Халық банктен ипотека алғанбыз. Қазір жағдайымыз жоқ, 2 топтағы мүгедек балам бар. Банк ипотеканы төлей алмаған соң, өзінің атына аударып алған. Төзіміміз таусылды. Банкке ақша бөлінді, келсек ақша жоқ дейді. Пәтерде 6 адам тұрамыз, ол банктің атында тұр. Жалғыз менің емес, көпшіліктің мақсаты, талабы – баспаналарын өзінде қалдырса екен. Басты мақсат осы. Жеке сот орындаушылар да, банкирлер де бұл іске араласып жатыр, - деді белсенді Гүлбақыш Рақымжанқызы.

Жиналған топ «Халық банктің» кеңсесіне баратындарын айтты. Олардың айтуынша банк қызметкерлері телефон тұтқасын көтермейді дейді. Қаржы нарығын реттеу мекемесінің ішінде наразы топ банк қызметкерлеріне бірнеше мәрте хабарласып көрді. Бірақ жауап берген ешкім жоқ.  

Автор: Бек Байтас, Жандос Мәдениет