Ирандағы аятоллалар режиміне қарсы Мюнхенде жаппай митинг өтті

Мюнхен қаласында Ирандағы аятоллалар режиміне қарсы ауқымды митинг ұйымдастырылды. Акция сыртқы саясат пен жаһандық қауіпсіздік мәселелеріне арналған әлемдегі негізгі форумдардың бірі саналатын Мюнхен қауіпсіздік конференциясының өтуімен тұспа-тұс келді, деп хабарлайды Orda.kz Deutsche Welle-ге сілтеме жасап.

Полиция деректеріне сәйкес, көшеге шамамен 200 мың адам шыққан. Қатысушылар қала орталығына 1979 жылға дейін, яғни исламшылар билікке келгенге дейін қолданылған Иранның мемлекеттік туын ұстап жиналды. Митингке шыққандар қазіргі билікке қарсылық білдіріп, ел ішіндегі наразылық білдіріп жатқан жұртшылықты қолдайтындарын мәлімдеді.

Иранның бұрынғы шахының ұлы Реза Пехлеви демонстранттарды қолдап, иран халқына халықаралық қауымдастықтың көмегі қажет екенін айтты. Ол күндізгі уақытта митингке өзі де келіп қатысты.

Халықаралық форумға байланысты қауіпсіздік шаралары күшейтіліп, Мюнхен қаласында бес мыңнан астам полиция қызметкері кезекшілік атқарды. Құқық қорғау органдары мәліметінше, акция қақтығыссыз өтті.

Иран Ислам Республикасы аумағында наразылық акциялары 1999 жылдан бері ұдайы өтіп келеді. Әдетте бұған дейін олар бейбіт сипатта болған. Алайда 2025 жылғы желтоқсанда митингілер құқық қорғау органдарымен қақтығыстарға ұласқан. Ол кезде билік тәртіпсіздіктерге АҚШ пен Израильді айыптаған болатын. 

Оқи отырыңыз:

• Мемлекет басшысы Иран президентін Ислам революциясы күнімен құттықтады
• Иранда әйелдерге мотоцикл айдауға және жүргізуші куәлігін алуға рұқсат берілді
• Еуроодақ Иран Қорғаныс күштерін террористік ұйым деп таныды