Инвестиция өсуде, инфляция бәсеңдеді: Үкімет жылдың экономикалық қорытындысын шығарды

Қазақстан экономикасы жаңа сыртқы жағдайларға бейімделіп, тұрақты өсу траекториясына шықты, ол 4,9%-ды құрады. Жан басына шаққандағы ішкі жалпы өнімнің деңгейі де – 11,5 мыңнан 13,3 мың долларға дейін өзгерді. Мұндай мәліметтерді 2023 жылдың қорытындысы бойынша үкімет мәлімдеді, деп хабарлайды Orda.kz Премьер-Министрдің баспасөз қызметіне сілтеме жасап.

Жылдың негізгі экономикалық көрсеткіштеріне тоқталған Үкімет инфляцияның баяулауын, инвестиция тартылғанын, өндірістің өсуін және жаңа жобаларды атап өтті:

«Инфляция жылдық мәнде 2022 жылғы желтоқсандағы 20,3%-дан қарашада 10,3%-ға төмендеді. Бұған 90 жедел және орта мерзімді қадамдарды қамтитын тиісті шаралар кешенін жүзеге асырудың арқасында қол жеткізілді».

Алты айда елге 13,3 миллиард долларлық тікелей шетелдік инвестиция тартылды. Үкімет бұл өте жоғары көрсеткіш және орта мерзімді перспективада экономикалық өсімнің кепілі екенін атап өтті.

«Жыл соңына дейін инвестиция көлемін шамамен 27 миллиард долларға жеткізу жоспарлануда» делінген хабарламада.

Экономиканың барлық салаларында 967,7 млрд теңгенің 210 жаңа инвестициялық жобасы пайда болып, 19,5 мың жұмыс орны ашылыпты.

«Жыл соңына дейін жалпы құны 1,6 трлн теңге болатын 291 жобаны пайдалануға беру күтілуде» деп нақтылады үкімет.

Машина жасаудағы өндіріс рекордтық қарқынмен - 26,8%-ға өсті. Сонымен қатар, автомобиль өнеркәсібінде және электр жабдықтарын өндіруде бұл көрсеткіш одан да жоғары – сәйкесінше 41% және 32% - ға жеткен.

«2023 жылы Қазақстан 65 миллиард доллардың өнімін экспорттады. Бұл ретте өңделген өнім экспорты 21 миллиард долларға жетті. IMD әлемдік бәсекеге қабілеттілік рейтингінде біздің еліміз өткен жылмен салыстырғанда алты сатыға көтеріліп, 64 елдің ішінде 37-орынға шықты» дегенді қосты.

«Қарапайым заттар экономикасы» кәсіпкерлікті қолдаудың мемлекеттік бағдарламасы шарттары жетілдірілді:

• өңдеуші өнеркәсіптердің қосымша түрлері енгізілген;

• субсидиялау мерзімі жеті жылға дейін ұзартылған экономиканың 20 негізгі секторының тізбесі анықталды;

• әлеуметтік кәсіпкерлік субъектілерін қолдаудың қосымша шаралары енгізілді.

«Кәсіпкерлік субъектілеріне қойылатын 10 мың қажетсіз талаптар жойылды. Тәуекелдерді басқару жүйелерін автоматтандыру жұмыстары да аяқталды. Бұл 2024 жылдан бастап бизнесті тексеру санын екі есеге азайтуға мүмкіндік береді. Оларды тағайындау кезінде адам факторы толығымен алынып тасталады» делінген хабарламада.

Үкімет мемлекет қабылдаған шаралар шағын және орта бизнестің өнімін 23 триллион теңгеден 29 триллионға дейін арттыруға мүмкіндік берді деп түсіндіреді.

ШОБ саласында жұмыспен қамтылған азаматтардың саны 500 мыңға артып, қазір 4,3 миллион адам болды. Яғни, елдің жалпы ішкі өніміндегі шағын және орта бизнестің үлесі 36,4 пайызға жеткен.

«Экономиканы монополиясыздандыру жөніндегі комиссия жұмысы басталы бері 15 кәсіпорынның, жеті ғимараттың, 160-тан астам теміржол жолдары мен құрылыстарының, басқа да мүліктердің акциялар пакеттері мен қатысу үлестері республикалық және коммуналдық меншікке қабылданды. Білім беру инфрақұрылымын қолдау қорына 2 млрд теңгеге жуық қаржы бөлінді» деді үкімет. 

Көбінесе инвесторлар мұнай-газ саласы мен Атырау облысына назар аударады. Өңірлер арасында Ұлытауға, ал салалар арасында аңшылыққа аса қызығушылық танытуда.