Сенат депутаты Ақылбек Күрішбаев ауыл оқушыларының білім деңгейі қала жастарынан төмен екенін еске салды. Ол жастардың білімге қол жеткізудегі қиындықтарына алаңдаушылық білдірді.
Бұл туралы Orda.kz хабарлады.
– Ауылдық жерлерде 2100 педагог тапшы. Республикада 60% кадр жетпейді. Салдарынан ауыл балалары грантқа түсу үшін ҰБТ-дан қажетті бал жинай алмайды. Оқулары сол жерде қалады. Көбісінің ақылы негізде оқуға жағдайлары жоқ, – деді депутат.
Депутат аграрлық мамандықтарға ауылдық квотаны 30%-дан 50%-ға дейін көтеруді ұсынды.
Күрішбаевтың айтуынша, жыл сайын жоғары оқу орындары түлектерінің тек 30%-ы ғана ауылға жұмысқа келеді. Салдарынан ел бюджеті де жыл сайын 1,5 млрд теңгені тиімсіз жұмсайды.
– Парламент депутаттары ҚР Білім және ғылым министрлігіне ауыл мектептерінің түлектеріне аграрлық мамандықтарға түсу үшін ауылдық квотаны 30%-дан кем дегенде 50%-ға дейін арттыру қажеттілігі туралы айтып жүргендеріне көп болды. Бірақ мәселе әлі де шешілмей жатыр. Аграрлық университеттерді бітірушілердің, ауылдық жерлерге жыл сайын тек 30%-ы ғана жұмысқа орналасады. Қалғандары мемлекеттік қаражат есебінен оқып, жұмыссыздар қатарын толықтырып, қалада қалады, – деді Ақылбек Күрішбаев.
Елімізде білім беру гранттарын бөлу тетігіне өзгерістер енгізетін кез келді.
Сенат депутаты Ақылбек Күрішбаев
Оның айтуынша, мемлекеттік грант пен стипендия тест нәтижесі мен үлгерім негізінде ғана емес, әлеуметтік көмек көрсету мақсатында да бөлу керек.
– Ауыл мектептерінде бір мұғалім физика, әдебиет және музыканы оқытатын жағдайлар бар. Қала мен ауыл мектептерінің материалдық-техникалық базасы салыстыруға келмейді, – деп қорытындылады депутат.
