БҚО-да бұрынғы әйелін қызғаныштан 19 рет пышақтаған адамға үкім шықты

Биыл 27 мамырда Теректі ауданының Шаған кентінде ер адам бұрынғы әйелін пышақтады. Ауыр жарақат алған әйел жедел жәрдем келгенше қайтыс болды. БҚО қылмыстық істер жөніндегі мамандандырылған ауданаралық сотында қылмыскердің тағдырын алқабилер шешті, деп хабарлайды Orda.kz. 

Сотта айтылғандай, 32 жастағы Сырымбек Сайлауов бұрынғы әйелі мен балалары тұрып жатқан үйге келген. Үйде әйелдің туған інісі болады. Ер адамның қызғанышы оянып, әйеліне 19 рет пышақ салып, оның інісін 2 рет басынан ұрады. 

Сот-медициналық психиатриялық сараптама Сайлауов қылмыс кезінде аффект күйінде болмаған деген қорытынды шығарған. Алайда сотталушының адвокаты Жомарт Ерназаров бұл шешіммен келіспейді.

Марқұмның әпкесі сотта сөйлеп, айыпталушыға ең қатаң жаза беруді сұрады. Ал Сырымбек Сайлауов істеген ісіне өкінетінін айтты.

Прокурор соттан Сайлауовты ерекше қатыгездікпен кісі өлтірді және кісі өлтіруге оқталды деген баптар бойынша кінәлі деп танып, 16 жылға бас бостандығынан айыруды, сондай-ақ 30 млн теңге моральдық өтемақы өндіріп беруді сұрады.

30 қазанда үкім жарияланды. Алқабилер ер адамға 16 жылға бас бостандығынан айыру жазасын тағайындады. Сондай-ақ Сайлауов бұрынғы әйелінің туыстарына 10 миллион теңге моральдық залал төлеуге тиіс. 

Сайлауов үкіммен келіспейді. Ол алқабилер құрамында негізінен әйелдер болғанын және олар жағдайға біржақты қарағанын атап өтті. Сотталушы үкімге шағымдануға ниетті. 

Айта кетейік, Петропавлда такси жүргуізшісін темекі үшін өлтірген адам сотталды.