Аутист балаларды «өлтіруге үндеген» алматылық блогер елден кешірім сұрады

Әлеуметтік желіде аутизм диагнозы бар балалар мен олардың ата-аналары туралы жағымсыз пікір жазған блогер Райхан Жұмамұратова жұрт алдында сөз сөйледі, деп хабарлайды Orda.kz.

Блогер өзінің Facebook парақшасында бейне жариялап, сол кездегі эмоциясының әрекетіне әсер еткенін айтты.

«Ауыр пікір жазғанымды қаншама ата-ана жекеме шығып жатқан соң түсіндім. Аутист диагнозы осындай көп деп ойламаппын. 2 жасар бала өзімнің баламмен жасты болған соң, сол баланың орнына өз баламды лақтырып жібергендей сезім болып, ашуға беріліп айтып қойдым. Шын көңілмен кешірім сұраймын», – деді ол.

Блогер ешкімді ренжіткісі келмегенін де атап өтті.

Айта кетейік, бұған дейін блогер желіде «аутист балалар көп болып кетті. Оларды емдету керек, емделмесе өлтіру керек. Немесе оларға арнап аурухана ашу керек» деп жазған болатын. Осы пікіріне байланысты Autism Kazakhstan ұлттық қауымдастығы Бас прокуратураға және ҚР ІІМ-не ресми шағым түсірген.