Алла Пугачёва ағасының Семей полигонындағы радиациядан зардап шеккенін айтты

Әнші Алла Пугачёва журналист Катерина Гордееваға берген сұхбатында өзінің отбасы мен туған бауырының қасіретті тағдыры туралы айтып берді. Оның айтуынша, ағасы кеңес дәуірінде Қазақстанда әскери қызмет етіп, Семейдегі ядролық полигонда радиацияға ұшыраған, деп хабарлайды Orda.kz.

«Әуелі ағам әскери қызметте болды, байланыс саласының мықты маманы еді. Семейде, Қытай шекарасында қызмет етіп жүріп сәуле тиді. Кейін балалары өлі туа бастады. Содан соң оны әлдебір себеппен Ауғанстанға жіберді» — деп еске алды Пугачёва.

Пугачёваның ағасы бала кезінен тіл үйренуге бейім болып, әскери шет тілдер институтына түсуге армандаған екен. Алайда саусағында кемістік болған соң ол жерге қабылданбаған.

«Барлық емтиханын үздік тапсырған еді. Бірақ институтқа алмай қойғаны үлкен қасірет болды. Сол кезде жүйкесі сыр беріп, ішімдікке салынып кетті», — деді Алла Пугачёва.

 Кейін оны әскери байланыс училищесіне жіберді. Сөйтіп ол арманына жете алмай, әскери маман болып шықты. Пугачёваның айтуынша, ағасы өте дарынды адам болған. Өлең жазып, ән айтып, музыкамен айналысқан. Ақыры кеңестің арнайы қызметінде жұмыс істеді.

«Психикасында бір тұрақсыздық болды. Ал шын мәнінде өте талантты жан еді…» — деп еске алды әнші.

Әртістің айтуынша, ағасының қасіретті тағдыры, әскери қызметі мен радиация салдары бүкіл отбасына ауыр әсер еткен.

Пугачёва соғысты және «биліктің шексіздігін» сынға алды. Сөз бостандығы жайлы сөз қозғап, керісінше әркімнің өз ойын ашық айтуы айту құқығы — нағыз патриотизм екенін жеткізді.

Әнші сұхбатында балалық шағын, жоқшылықта болған кездерін, майдангер әкесін, ағасының қасіретті тағдырын, сондай-ақ шығармашылық жолын — «Арлекино» мен «Золотой Орфейден» бастап Чернобыльді жоюшыларға арналған концерттерге дейін қалай жеткенін еске алды.

Сөзінің соңында Пугачёва көпке:

«Шындықты айтуды үйреніңіздер. Өмірдің әр сәтіне қуаныңыздар. Соғысты қызықтап емес, бейбітшілікті тілеп дұға қылыңыздар»,– деп үн қатты