Ақтөбеде парашютпен секірген курсант мерт болды

Ақтөбеде Әуе қорғаныс күштері институтының 18 жастағы курсанты алған жарақатынан мерт болды. Әскери оқу-жаттығу кезінде парашют ашылмай қалған. Осы іс бойынша қылмыстық іс қозғалды, деп хабарлайды Orda.kz.

Оқиға 15 шілде күні Ақтөбе облысы Мәртөк ауданы Сарыжар ауылы маңында болды. Курсант сол күні әскери институттың ұшу айлағында парашютпен секіру жаттығуын жасаған. 

Марқұм Бақыт Асарбаев келесі айда 19 жасқа толар еді. Оның Астана қаласының тумасы екені айтылады. Достары желіге курсанттың фотосын жүктеді, қимай қоштасты.

Ақпаратты ҚР Әуе қорғанысы күштері әскери институты растады. Ресми дерек көзіне сүйенсек, қайғылы оқиғаға қатысты қылмыстық іс қозғалып, тергеу амалдары жүріп жатыр. 

«Курсант жоспарлы оқу-жаттығу кезінде парашютпен секіргенде өміріне қауіпті жарақат алды. Бұл қайғылы жағдайға себепкер болды. Факт бойынша қылмыстық іс қозғалды. Оқиғаның барлық мән-жайы анықталып, тергеу жүреді. Әскери институт пен Әуе қорғаныс күштерінің қолбасшысы қаза тапқан курсанттың туыстарына қайғыра көңіл айтады»  деп жазды ресми хабарламада.  

Айта кетейік, 2024 жылдың қараша айында Мәртөк ауданындағы әскери полигонда тікұшақ құлады. Сол күні бір әскери қызметкер қаза болған еді.

Автор: Ардақ Ерубаева