90-жылдың бандиттері ондай қатыгез болмаған шығар — Қаржаубайдың адвокаты

Қоғамды дүр сілкіндірген 16 жасар Шерзат Полаттың өліміне қатысты сот Талдықорған қаласында өтіп жатыр. Бүгін жәбірленуші тараптың адвокаты Мейірман Шекеев жарыссөзде сөйледі, деп хабарлайды Orda.kz.

Мейірман Шекеев: «Сотталушылар қанша жылға сотталса да, тірі келеді. Ал менің балам өлді» деген Шерзаттың әжесінің сөзімен сөз бастады. Ол жарыссөзде сот қандай шешім шығарса да, елдің есінде қалатынын атап өтті. Сонымен қатар, Шекеев сотталушылардың Шерзат Полатқа пышақ сұғылып, қансырап жерде жатса да, қалғандары анасының зарына қарамастан аяусыз ұрғанын еске салып, 90-жылдың бандиттері де ондай қатыгез болмағанын айтты.

«Бұл қарапайым ғана азаматтың соты емес, бұл соттың, прокурордың жалпы әділет жүйесінің ар-ожданы сынға түскен сәт. Сондықтан бүгінгі сот қандай шешім шығарса да, халықтың есінде қалары ақиқат. Бұл тарих, әрі сот жүйесінің бейнесі болмақ. Құрметті сот, сізден дәйектермен дәлелденген фактілерді ғана емес, қан жылаған ананың көз жасын көруді сұраймын. Егер мұндай ауыр қылмысқа лайықты жаза тағайындалмаса, бұл қоғамда әділетсіздік орнап, қылмыстың қайталануына жол ашады. Шерзат қайтып келмейді, алайда әділ үкім Шерзаттың анасының көз жасын сүртуге көмек болар. Осы залда заң жүзінде ғана емес адамдық қасиеттің болғанын қалаймын. Абай атамыз айтпақшы, әділет адамгершіліктің негізгі шарты. Сотталушыларға ең ауыр жаза тағайындауды, әрі моральдық, материалдық шығынды міндеттеуді сұраймыз»,– деді Шекеев.

Сонымен қатар, Шекеев Нұрымов Қаржаубайдың атынан сотталушы кәмелеттік жасқа толмаған Думан Ысқаққа кешірім бергенін жеткізді. Сондай-ақ, Бағдагүл Әжіғалиева жарыссөзде сотта маңызды дәлел болып саналатын бейнежазба дискінің жоғалып кеткенін айтты. Оған қоса куәгер Арлан Қазыкенов көліктегі бейнетіркегіштегі жазбаны жойып жібергенін артынан тергеуде қайта қалпына келтіргенін жеткізді.

Еске сала кетсек, бұған дейін мемлекеттік айыптаушы Шерзат Полатты өлтірді деп айыпталған тұлғаларға ауыр жаза тағайындауды сұрады.

Orda.kz тілшілері қоғамды дүрліктірген осы сот отырысына басынан бастап қатысып келе жатыр. Алғашқы сот отырыстарында 16 жасар бозбаланың өліміне қатысты сотқа жәбірленушілер мен куәгерлер келіп, мән-жайды баяндап берген еді. 

Ал 6 мамыр күні Нұрғанатты заңсыз бейнежазбаға түсірген полицей қызметкері Медет Әділжанов пен айыпталушы Дархан Әскентай сот алдында жауап берді. Ал 15 мамыр күні күдікті, ағайынды Тоқтаубаевтар жауап берді. 16 мамыр 9 күдіктінің бесеуі жауап берді. Олар оқиға орнына қалай барғанын және кімнің қандай әрекет жасағанын баяндады.

21 мамыр күні басты күдікті Абзал Шынасыл жауап беріп, өзінің пышақ сұқпағанын, Шерзатқа тиіспегенін айтты. Оның сөзінше, пышақты кім сұққанын көрмеген. 

Еске сала кетсек, Талғарда 4 қазан күні бір топ адам келіп дүкен иесі Қаржаубаймен, ұлы Шерзатпен және ағасы Нұрғанатпен жанжалдасып, арты кісі өліміне ұласты. 16 жасар Шерзат қаза болды. Бұл іс қоғамда үлкен резонанс тудырды.

9 желтоқсан күні таңертең жасөспірім Шерзат Полаттың ағасы Нұрғанат Ғайыпбаевтың денесі марқұм Шерзаттың зиратының қасынан табылды.

12 қазан күні Азат ауылындағы марқұм болған Шерзаттың отбасының үйі өртеніп кетті.