Тоқаев әскердегі сарбаздардың қазасына қатысты кеңес өткізді

Президент Қасым-Жомарт Тоқаевтың төрағалығымен Қарулы Күштердегі, басқа да әскерлер мен әскери құрылымдардағы әскери және құқықтық тәртіп мәселелері бойынша кеңес өтті, деп хабарлайды Orda.kz.

Ақорданың хабарлауынша, Қазақстан президенті Қасым-Жомарт Тоқаев күштік құрылым басшыларымен кеңес өткізіп, онда бас прокурор Берік Асылов, ішкі істер министрі Ержан Сәденов, қорғаныс министрі Дәурен Қосанов әскерилер арасындағы «тәрбие жұмыстары» туралы баяндама жасаған. 

«Президент заң мен тәртіпті одан әрі қамтамасыз етуге, әскердегі тәрбие жұмысын жетілдіруге, әскери қызметшілердің мерт болуына және жарақат алуына жол бермеу бойынша қабылданған шаралардың тиімділігін арттыруға бағытталған бірқатар нақты тапсырма берді», — деп жазылған Ақорда хабарламасында.  

11 қарашада Астанада балалары әскери борышын өтіп жүрген кезде қаза болған немесе жарақаттанған  ата-аналар митиң өткізіп, биліктен реформа жүргізуді, жапа шеккендерге әділ өтемақы төлеуді талап еткен. Ақыры арнайы жасақ келіп, аналарды автобустарға күштеп отырғызып, полиция бөлімшесіне алып кетті. Дегенмен Тоқаев бас прокурорға ата-аналардың арызын қарауды тапсырды. 

Еске сала кетсек, бұған дейін Еркебұлан Сағындықов Маңғыстау облысында мерзімді әскери борышын өтеп жүріп қаза тапты. Бұл шекара қызметінің сарбазының өлімін «бензинге уланды» деп, түсініксіз «кездейсоқ оқиға» ретінде жапты.

Ал 5 қазан күні Алматы облысында қаза тапқан сарбаздың туыстары Алматы қаласындағы орталық мәйітханадан оның денесін ала алмай отырғанын хабарлады. Ресми деректерге қарасақ, 18 жастағы Нұрасыл Әнуар менингококцемия деген диагноздан көз жұмған. Жақындары бұл нұсқаға сенбейді. 

Ал Шынарбек Дінмұхаммед Талғатұлы өзіне-өзі қол салды. Мүрдесін көруге ата-анасы Алматы қаласына келді. Orda.kz тілшісі марқұмның ата-анасымен сөйлесіп, жағдайға қатысты пікірлерін білді.

23 қыркүйекте Маңғыстау облысында 18 жастағы жас сарбаз Cұлтан Шынтеміров жындыханаға түсті.

Бұл биыл белгілі болған жаңалықтардың бір парасы ғана.