Темірлан Анарбеков ЧЛ матчына қатыса ма? «Қайрат» – «Ақтөбе» 1:0

Алматыда өткен Премьер-лиганың 23-турындағы ең маңызды кездесулердің бірі – «Қайрат» пен «Ақтөбе» арасындағы матчта қақпашы Темірлан Анарбеков жарақат алды, деп хабарлайды Orda.kz.

Оның Чемпиондар лигасының топтық кезеңіне қатысуы қазір күмән тудырып отыр.

Бұл ойын қарсаңында екі команда да турнир кестесінде берік орын алып тұрған еді: «Қайрат» 21 ойында 46 ұпай жинап, көшбасшылар қатарында болса, «Ақтөбе» 39 ұпаймен алғашқы төрттікте келеді.

Матч басталар алдында өткен айдың үздік ойыншысы атанған қақпашы Темірлан Анарбеков арнайы марапатқа ие болды. Марапат жанкүйерлердің қошеметімен беріліп, ойын алдындағы атмосфераны қыздырды. Ойынға алғаш рет Қырғызстаннан төреші Нұрзатбек Әдбіқадыров қазылық етті.

Алайда қуаныш ұзаққа созылмады: ойын басталмай жатып Анарбеков жарақат алып, оның орнына Шерхан Қалмырза шықты. Алдын ала мәлімет бойынша қақпашының жағы сынған.

Екінші таймда «Қайрат» командасының 9-нөмірлі ойыншысы Дастан Сәтпаев «Ақтөбенің» қақпасына гол соғып, есеп ашты. Осылайша «Қайрат» 49 ұпай жинап, ҚПЛ турнир кестесіндегі көшбасшылық орнын нығайтты. Ойын «Қайрат» – «Ақтөбе» 1:0 есебімен аяқталды.

Еске сала кетейік, Чемпиондар лигасының топтық кезеңінде «Қайрат» келесі ойынды 18 қыркүйекте Лиссабонда «Спортингке» қарсы өткізеді.