Тауқыметі таусылмаған Талғарда тағы да прокурор ауысты

Бір жыл бұрын 16 жастағы Шерзат Полаттың өлімі Қазақстанды дүр сілкіндіріп, шенеуніктермен қоса прокурор да ауысқан еді. Бір жылдан соң Талғарда тағы да прокурор ауысты. Бұл жолы қызметке Жайнарбек Мыңбаев тағайындалды, деп хабарлайды Orda.kz.

Жайнарбек Мыңбаев бұл орынға 2024 жылдың қазан айында тағайындалған Ерлан Тағаевтың орнына келді.  

Жалпы соңғы кезде Талғарда қанды қылмыстың өршіп кеткені баршаға мәлім мәселе. Осыдан бір жыл бұрын 16 жасар Шерзат Полат кісі қолынан мерт болған кезде Талғар ауданының полиция басшысы бір емес, қатарынан екі рет ауысты. Бірінші рет 2024 жылдың 2 желтоқсанында және 2025 жылдың 14 қаңтарында тағы да аудандық полицияның басшысы ауысты. Ал 2024 жылдың 18 қазанында Талғар ауданының прокуроры жұмысынан босатылды.

Еске сала кетейік, Талғар ауданының Қызылқайрат ауылында 2024 жылы 6 қыркүйек күні тағы да жаншошырлық қылмыс болды. Кездесіп жүрген қызын зорлап, бір ай бойы жалаңаш суреттері мен видеоларын түсіріп, қоқан-лоқы көрсеткен ер адамды полицияға ұстап апарып тапсырғанымен, Талғар полициясы оны қамауға алмастан босатып жіберген. Салдарынан келесі күні күдікті зорланған қыздың ағасын жүрек тұсынан екі рет атып, 3 жасар бүлдіршінді кепілдікке алған еді. Бұл оқиғаның мән-жайын мына материалдан оқи аласыздар.