Тәуелсіздік күні Алматыдағы телемұнараның келбеті жаңартылды

Қазақстан Республикасының Тәуелсіздік күніне орай Алматы қаласы, Бостандық ауданында, Сәтбаев пен Желтоқсан көшелерінің қиылысында орналасқан биіктігі 200 метр телерадио хабарын тарататын мұнараға сәулеттік жарықтандыру берілді, деп хабарлайды Orda.kz.       

«Жаңартылған жарықтандыру қаладағы ең танымал инженерлік нысандардың бірі саналатын телемұнараның бірегей құрылымын айқындап, оны мегаполистің кешкі келбетінің айшықты нүктесіне айналды. Осылайша нысан тек қалалық инфрақұрылымның функционалдық бөлігі ғана емес, сонымен қатар Алматының заманауи сәулеттік жарықтандыруының маңызды элементіне айналды» деп жазады әкімдік сайтында. 

Әкімдіктің хабарлауынша жоба аясында заманауи жарық прожекторларын орнату, жаңа кабель желілерін тарту, сондай-ақ әртүрлі жарық үлгілерін жасауға мүмкіндік беретін интеллектуалды басқару жүйесін енгізу бойынша кешенді жұмыстар атқарылыпты.

Еске салсақ, бүгін Алматыда Тәуелсіздік монументіне гүл шоғын қою рәсімі өтті.