Ішкі істер министрі Ерлан Тұрғымбаев электросамокатпен тас жолда жүруге болмайтынын мәлімдеді.
Бұл туралы Orda.kz хабарлады.
Министрдің айтуынша, самокатпен жүретіндер жоқ жерден қиындық тудырып жатыр.
– Бүгінде сағатына 80 шақырымға дейінгі жылдамдықпен жүретін электросамокаттар бар. Бірақ қолданыстағы заңнамаға сәйкес, олар жол қозғалысына қатысушы көлік қатарына жатпайды. Яғни, жол қозғалысы туралы заңда ондай көлік енгізілмеген. Электросамокаттардың заңда көлік қатарына енгізілмеуінің бірнеше себебі бар. Біріншіден, бұл техникалық құралғының сертификаты жоқ, екіншіден, олар көлік құралына қойылатын талаптарға, яғни дөңгелектің диаметріне, тежеу жүйесіне, бүйір шамдардың, артқы көрінетін айналар мен қауіпсіздік жүйелерінің болмауына байланысты, қауіпсіздік талаптарына сай келмейді. Электросамокаттармен тас жолдарда жүруге қатаң тыйым салынады, – деді Ерлан Тұрғымбаев.
Министр алда бұл мәселені шешуге уәде берді.
– Себебі бірқатар электросамокаттардың жылдамдығы сағатына 20 шақырымнан асады. Бұл мәселе елімізде ретке қойылмаған. Қазіргі уақытта барлық мүдделі мемлекеттік органдардың қызметкерлерінен жұмыс тобы құрылды. Менің ойымша, осы топтың шешімі бойынша қолданыстағы заңнамаға өзгерістер енгізіледі, – деді.
