Талғарда Шерзаттың өртенген үйіне қатысты тергеу жүріп жатыр

Талғарда Шерзат Полаттың отбасы тұрған үйдің өртенуіне байланысты тергеу іс-шаралары жүріп жатыр, деп хабарлайды Orda.kz.

Оқиға орнынан түсірілген кадрларда олардың мүлкінен ештеңе қалмағаны байқалады. Шерзаттың ісіне қатысты ақпараттарды салып отыратын парақшада облыс әкімі Каржаубайдың (үйдің қожайыны) үйін қайта қалпына келтіруге уәде бергені жайлы жазылған. Алайда, тергеу шараларына байланысты бұл жұмыс әлі де кешігіп жатыр. Сондықтан көпбалалы отбасының өз баспанасы қашан қайта қалпына келтірілетіні белгісіз. Олар уақытша туыстарының үйінде тұрып жатыр.

«Шерзат Полаттың отбасы ешқандай қаржы жинау туралы хабарландыру бермеді. Олардың атынан ақша жинап жүргендердің барлығы – алаяқтар! Егер Каржаубайдың отбасына қаржылай қолдау қажет болса, бұл жайлы ақпаратты ресми парақшаларда міндетті түрде жариялаймыз» деген жазба жарияланды арнайы парақшада. 

Еске сала кетейік, бұл шудан соң күдікті ретінде кейінірек ұсталғандардың бірінің анасы Қазакенова Лейла бейнеүндеу жасап, баласының оқиға орнында болмағанын айтты. Оның айтуынша БАҚ-та тараған 13 адам деген сөзге бола, адам санын толтыру үшін оның баласы мен досын ұстап әкеткен.

Еске сала кетсек, ІІМ бірінші орынбасары Бауыржан Әленов пен бас прокурор Берік Адамов және тергеу ісін қолға алған Самат Аисов 15 қазан брифинг өткізген. Ұсталғандардың кімдер екенін сол брифингте айтып берген еді. 

Шерзаттың үйі өртенген түні болған бар оқиғаны мына сілтемеден оқыңыз.