«Сөз бостандығының құны бар»: Айдос Садықовтың есімі әлем журналистері мемориалына қашалып жазылды

Францияның Байе қаласында әлем журналистері мемориалына қастандықпен өлтірілген қазақстандық журналист Айдос Садықовтың есімі қашалып жазылды, деп хабарлайды Orda.kz. 

Бұл туралы Садықовтың жұбайы Наталья Садықова Facebook парақшасында жазды.

«Ол ақиқат үшін өмірін құрбан етті. Енді оның есімі сөз бостандығы үшін қаза болған журналистердің арасында мәңгі қалады. Сөз бостандығының құны бар, Айдос ол үшін өмірін берді» деп жазды жұбайы.

«Шекарасыз тілшілер» (Reporters Sans Frontières) ұйымы 2006 жылы ашқан мемориал кәсіби міндетін атқару кезінде қаза тапқан журналистердің құрметіне арналған. Енді олардың қатарында «Бәсе» YouTube-арнасының авторы, қазақстандық журналист Айдос Садықовтың да есімі бар.

Фото: Н. Садықова және И. Петрушова

Еске сала кетейік, Айдос Садықов 2024 жылы Киевте қастандық салдарынан көз жұмған. Украина полициясы қылмысқа Қазақстан азаматтары — Алтай Жақанбаев пен бұрынғы полицей Мейрам Қаратаевты күдікті ретінде атаған.  Ал марқұм журналистің жақындары мен құқық қорғаушылар Садықовтың өліміне Қазақстан билігінің қатысы бар деп есептейді.