Солтүстік Корея Жапон теңізі бағытына тағы да зымыран ұшырды

Солтүстік Корея Жапон теңізі бағытына бірнеше баллистикалық зымыран ұшырды. Оңтүстік Корея әскерилерінің мәліметінше, зымырандар шамамен 900 шақырым қашықтыққа ұшқан. Бұл КХДР-дың 2026 жылғы алғашқы қару-жарақ сынағы, деп хабарлайды Orda.kz Deutsche Welle-ге сілтеме жасап.

Жексенбі күні, 4 қаңтарда, Солтүстік Корея Жапон теңізі бағытына бірнеше баллистикалық зымыран ұшырды. Оңтүстік Корея әскерилері ұшыруларды Пхеньян маңынан жергілікті уақыт бойынша шамамен 07:50-де тіркеді. Әскерилердің дерегіне сәйкес, зымырандар шамамен 900 шақырымға дейін ұшқан.

Жапонияның жағалау күзеті кем дегенде бір зымыранның теңізге құлағанын хабарлады. Оңтүстік Корея президентінің кеңсесі орын алған жағдайға байланысты шұғыл отырыс өткізді.

Бұл — КХДР-дың 2026 жылғы алғашқы зымыран сынағы. 2025 жылғы 29 желтоқсанда ел басшысы Ким Чен Ынның қатысуымен екі стратегиялық қанатты зымыран Сары теңіз бағытына ұшырылған болатын. Бұған дейін Солтүстік Корея қараша айының басында баллистикалық зымырандарды сынақтан өткізген еді. Бұл АҚШ президенті Дональд Трамптың аймаққа сапары кезінде Ким Чен Ынмен кездесуге мүдделілік танытқанынан шамамен бір апта өткен соң болған. Алайда Пхеньян бұл ұсынысқа жауап берген жоқ.

Сонымен қатар, 11 қазанда КХДР басшылығы екі жылдан кейін алғаш рет Пхеньянда ірі әскери парад өткізіп, онда жаңа «Хвасон-20» құрлықаралық зымыранын көрсетті. Мемлекеттік ЦТАК ақпарат агенттігі оны «ең қуатты ядролық стратегиялық қару» деп атап, осы зымыранның көмегімен Солтүстік Корея АҚШ аумағындағы нысандарды жоюға қабілетті болатынын мәлімдеді. Парадта Солтүстік Корея басқа да қару-жарақ түрлерін, соның ішінде гипердыбыстық зымырандарды таныстырды.

Оқи отырыңыз:

Солтүстік Кореяның сегізінші зымыран ұшырғанына АҚШ ашулы

Солтүстік Корея Жапонияға баллистикалық зымыран ұшырды

Ким Чен Ын тыңшылық спутнигін ұшыруға қызын алып келді

Әлем көз тіккен көшбасшылар салғыласуды қойып іске көшті: Трамптың атомдық сүңгуір қайықтары Ресей жағалауына қойылды ма?