Шымкентте әйел халық емінен шипа іздеп, өлім аузынан қалды

Куркума мен сірке суын қолданып, шипа іздеген әйел өлім аузынан қалды, деп хабарлайды Orda.kz.

Шымкент қалалық №2 ауруханасының бас дәрігері Бақытжан Позилов бұл туралы өзінің Instagram парақшасында мәлімдеді. Оның айтуынша, 53 жастағы әйел интернеттегі халықтық емнің нұсқаулығы арқылы қан қысымын төмендетпек болған. Ол дәрігер тағайындаған дәрілердің орнына алма сірке суы мен куркума ішкен. Нәтижесінде науқас ауыр халде ауруханаға түсті.

Дәрігерлер оған анафилактикалық шок пен Лайелл синдромы диагнозын қойды, бұл — аллергиялық буллезді дерматиттің ауыр түрі, «қайнатып тастаған тері синдромы» деп те белгілі. Әйел екі күн ес-түссіз жатты, ал дәрігерлер оның өмірі үшін күресті.

«Науқас екі күн ауыр жағдайда болды және бүгін ғана есін жиды. Халықтық емдеу әдістері кейде тиімсіз, ал кейде денсаулыққа үлкен зиян келтіруі мүмкін. Сақ болыңыздар» деп жазды Бақытжан Позилов.

Бұған дейін қазақстандықтардың денсаулық сақтау жүйесіне деген сенімі азайғаны туралы хабарланған болатын. STADA Health Report 2024 халықаралық зерттеуіне сәйкес, қазақстандықтардың тек 17%-ы дәстүрлі медицинаға толық сенеді, 40%-ы жалпы сенім білдіргенімен, кейбір мәселелерді өз бетінше интернеттен зерттейді, ал 23%-ы дәстүрлі медицинаның ұсыныстарына күмәнмен қарайды.