ШҚО әкімінің орынбасарына қатысты тергеу туралы ақпаратты ҰҚК растады

Омарға қатысты сотқа дейінгі тергеу басталды. Бұл ақпаратты Orda.kz редакциясына Қазақстан ұлттық қауіпсіздік комитеті өкілдері растады. Алайда күштік құрылымда істің егжей-тегжейі жарияланбайды.

Жуырда Шығыс Қазақстан облысы әкімінің орынбасары Жақсылық Омар ұсталды деген ақпарат тарады. Сондай-ақ шенеуніктің денсаулығына байланысты демалыс алғаны туралы да мәлімет шыққан еді.

«Сотқа дейінгі тергеу жүргізілуде. Өзге ақпарат жария етілмейді»,  деп қысқа жауап берді ҰҚК.

Анықтама: 2018–2024 жылдары Жақсылық Омар Өскемен қаласының әкімі қызметін атқарды. 2025 жылдың сәуіріне дейін Шығыс Қазақстан облысы әкімінің кеңесшісі болды. Ал 2025 жылғы 7 сәуірден бастап ШҚО әкімінің бірінші орынбасары қызметін атқарып келеді.

Шенеуніктің есімі жуырда бір резонансты іске байланысты да аталған болатын. Өскеменде Үлбі өзені арқылы өтетін Шнайдер автокөлік көпірі құлаған. Соңғы екі жылда оның күрделі жөндеуіне 600 млн теңгеден астам қаржы жұмсалған.

Ол кезде жөндеу жұмыстарын қала әкімі болған Жақсылық Омар бақылаған.