Сенат «ЛГБТ насихатына тыйым салу» туралы заң жобасын қарауды кейінге қалдырды

Сенат «ЛГБТ насихатына тыйым салу туралы» заң жобасын қарауды бүгінгі пленарлық отырыстың күн тәртібінен алып тастады, деп хабарлайды Orda.kz. 

Дегенмен бастапқыда бұл заң жобасы аңдатпада болған еді. Бұған дейін мәжіліс ЛГБТ насихатына тыйым салуды қарастыратын түзетулерді қабылдап, сенатқа жолдаған.

«Қоғамдық орында, сондай-ақ бұқаралық ақпарат құралдарында, телекоммуникациялық желілерде  педофилияны немесе дәстүрлі емес жыныстық бағдарды насихаттауды қамтитын ақпаратты онлайн - платформаларды пайдалана отырып таратуға тыйым салынады», деп хабарлады мәжілістің баспасөз қызметі.

Сонымен қатар, ЕО-ның Қазақстандағы елшісі Алешка Симкич Республика сенаты төрағасының орынбасары Жақып Асановпен кездескен кезде ЛГБТ-ны насихаттауға тыйым салу туралы түзетулерге алаңдаушылық білдіргенін айтқан. 

Айта кетейік, бүгін Астанаға Еуропалық Кеңес президенті Антониу Кошта ресми сапармен келеді.