Сара Назарбаева ауыр халде жатыр ма? Назарбаевтың жұбайы жайлы деректер шықты

«Orda» басылымының бірнеше дереккөзі Қазақстанның бұрынғы президенті Нұрсұлтан Назарбаевтың жары – Сара Назарбаеваның ауыр науқас екенін растады. Ол ҚР президенті іс басқармасы медициналық орталығының госпиталінде емделіп жатыр. Бұл жерде мемлекет басшылары да емделген еді, деп хабарлайды Orda.kz.

Денсаулық сақтау басқармасы дәрігерлер құпияны сақтауы қажет екенін айтты.

Назарбаевтың баспасөз хатшысы телефонына жауап бермеді. Айдос Үкібай қоңырауларға да, хабарламаларға да жауап бермей отыр. Ешқандай ресми мәлімдеме жасалған жоқ.

Сонымен қатар, Сара Назарбаеваның жақындары оның қасында екені хабарланды.

Сара Алпысқызы 84 жасқа толды. Ол Қазақстан тәуелсіздік алған күннен бастап 2019 жылға дейін ресми түрде бірінші ханым болды. 2023 жылдың желтоқсанында жарық көрген мемуарларында бұрынғы елбасы Сара Алпысқызынан басқа әйелі бар екенін мойындады. Нұрсұлтан Назарбаев сол кезде Әсел Исабаевамен діни некеге отырғанын жариялаған.

Биыл қаңтар айында Мемлекет басшысы Қасым-Жомарт Тоқаев заңға түзетулер енгізді. Бұл түзетулерге қарасақ, бұрынғы президенттердің және олардың отбасы мүшелерінің денсаулығы мен жеке өмірі туралы мәліметтер мемлекеттік құпияға жатады, сондықтан ондай ақпаратты таратуға тыйым салынады.