Павел Дуров Франциядан кетуге мүмкіндік алды

Соттың рұқсатымен Telegram негізін қалаған Павел Дуров Франциядан Дубайға кетіп қалды, деп хабарлайды Orda.kz франциялық БАҚ-қа сілтеме жасап.

Telegram желісі негізін қалаушы және ВКонтакте әлеуметтік желісін құрушы Павел Дуров Париж Ле Бурже әуежайында  ұсталғанын жазда хабарлаған болатынбыз. Дуров 2024 жылдың тамызында Парижде ұсталды. Оған бірқатар ауыр қылмыстар, соның ішінде лаңкестікке көмектесті деген және есірткі саудасы бойынша айып тағылды.

Француз сот жүйесі өз кезегінде 2017-2024 жылдар аралығында Telegram арқылы жасалған қылмыстарға қатысты 2 мыңға жуық  қылмыстық іс қозғалғанын хабарлады. 

Ұсталғаннан бірнеше күннен кейін ол кепілге босатылды. Дуров елден шығу мүмкіндігінсіз аптасына екі рет полицияға хабарласып тұруға мәжбүр болды.

2025 жылдың ақпанында кәсіпкердің ісі сотқа бір жылдан кейін түсетіні белгілі болды.

Өткен жазда Цифрлық даму министрлігінің басшысы Жасұлан Мәдиев Telegram негізін қалаушысы Павел Дуровты елге шақырып, ол Қазақстанға келген болатын. 

Сол кезде  «Қазақтелеком» басшысы Бағдат Мусин жақында Telegram компаниясы басшылығымен кездескенін айтып, Павел Дуровпен әңгіме барысында транзиттік операторларсыз желілер арасындағы  трафикті тікелей алмасу туралы келіскенін мәлімдеді. 

 Артынша Ресей Мемлекеттік Думасының вице-спикері Владислав Даванков Ресей Сыртқы істер министрлігі басшысына Дуровты босатуға қол жеткізу туралы үндеу жолдаған болатын.