Нұрайдың шағымын елемеген полиция қызметкерлеріне қатысты қылмыстық іс қозғалды

Нұрайдың шағымын елемей, қызды қорғау бойынша тиісті шаралар қабылдамаған полиция қызметкерлеріне қатысты қылмыстық істер қозғалды, деп хабарлайды Orda.kz.

Бұл туралы Сенат қабырғасында Қазақстан Республикасы Ішкі істер министрінің орынбасары Санжар Әділов мәлімдеді. Оның айтуынша, қылмыстық істер олар қызметтен босатылған күні-ақ қозғалған.

«Сол күні-ақ министрлік тәртіптік комиссия аясында Шымкент қалалық полиция департаментінің басшысын, оның орынбасарын, полиция басқармасының басшысын атқарып отырған қызметтерінен босату, сондай-ақ жәбірленушінің өтініші бойынша қылмыстық іс қозғау жөнінде шара қолданбай, істі номенклатуралық іске тіркеп қойған лауазымды тұлғаларды жұмыстан шығару туралы шешім қабылдады. Сонымен қатар сол күні Ішкі қауіпсіздік департаментінің қызметкерлері Шымкент қаласына іссапармен барып, салғырттық дерегі бойынша қылмыстық іс қозғады», — деді ол. 

Айта кету керек, жергілікті полицияның басшысы Нұрлан Алмасбеков пен оның бірінші орынбасары Құрманбек Сахов қызметтен босатылды. Ал қылмыстық істер, болжам бойынша, қыздың өтініштеріне дер кезінде жауап бермеген қатардағы полиция қызметкерлеріне қатысты қозғалған.

Еске салайық, 20 қаңтарда Қазақстан Президенті Қасым-Жомарт Тоқаев Шымкент қалалық полиция департаментінің әрекеттерін тексеруді тапсырған болатын.

Тақырыпқа қатысты оқи отырыңыз:

• «11 жеріне пышақ сұққан»: Шымкентте кісі қолынан қаза тапқан қыздың денесі туыстарына берілді
• Тоқаев Нұрайдың өлімінен кейін Шымкент полициясының жұмысына баға беруді тапсырды
• Жаркентте баласын байлап сабаған әйелдің психоневрологиялық есепте тұрғаны анықталды