Нұрай ісі: марқұмның ағасы желідегі бейнежазбаларға пікір білдірді

Шымкент қаласында кісі қолынан қаза тапқан Нұрай Серікбайдің ағасы Сұлтан Серікбай әлеуметтік желіде тараған бейнежазбаларға қатысты өз пікірін білдірді, деп хабарлайды Orda.kz.

Әлеуметтік желіде Нұрай күдікті Шерханның үйіне өз еркімен барған деген видео тарады. Алайда, Сұлтан Серікбай видеодағы көріністер шындыққа сай келмейтінін айтты.

«Алып қашқан кезінде негізінен қара көлікпен шыққан, басқа маркалы көлік болған және Нұрай үй киімімен шыққан. Ал видеода көлік ақ түсті және маркасы басқа. Нұрай бір өзі болған. Жанындағы 50 адам сырт жақтың адамдары. Видеода күліп тұрған Нұрай емес. Оның алдында тұрған басқа кісі. Соңында Нұрай қарсыласып орамалын шешіп тастамақ болған, яғни, оның қаламағаны көрініп тұр», – дейді ағасы Сұлтан Серікбай.

Сұлтан Нұрайдың полиция бөлімінде түсірілген бейнежазбасына да өз көзқарасын білдірді. Видеода марқұм Нұрай күдіктіге арыз жазбайтынын айтады, ал ағасының сөзінше, бұл жағдай психологиялық қысым арқылы жасалған.

«Нұрайдың барынша шаршаңқы, моральдық тұрғыда қажығаны көрінеді, сол үшін барынша қысым көрсетіліп, манипуляция арқылы видео түсірілген. Нұрайдан бөлек бөлмеде бірнеше ер адам болған. Бізді кіргізбеді. Сол себепті барынша басынған», – дейді Сұлтан Серікбай. 

Ағасы видеолардың әлеуметтік желіге таралуы тергеуге әсер ететінін ескертіп, тергеуге сенім білдірді:

«Бұл – тергеу материалдары, оны жариялау заңға сәйкес келмейді. Біз тергеуге толық сенеміз», – деді Сұлтан.

Еске сала кетейік,  оқиға орнында мерт болған 21 жастағы Нұрай Серікбай сол маңдағы көпқабатты тұрғын үйлердің бірінде отбасымен бірге өмір сүрген. Оқиғадан кейін Нұрайдың 11 жеріне пышақ сұғылған. Бетін тіліп тастаған. Екі ағасы бар, үйдің – кенжесі. Студент. Әке-шешесі қалада түрлі салада жұмыс істейді.