Мемлекеттік төңкеріс ұйымдастырмақ болған қылмыстық топ ұсталды

Қырғызстанда қолдан жасалған жарылғыш заттарды қолданып, билікті қарулы түрде басып алуға әрекеттенген бес азамат ұсталды.

Бұл туралы Қырғызстан Ұлттық қауіпсіздік мемлекеттік комитеті хабарлады.

«Билікті күшпен басып алуды және жаппай тәртіпсіздіктер арқылы жағдайды тұрақсыздандыруды жоспарлаған топтың әрекеті тоқтатылды. Қ.Б.А., М.Е.Ж., Б.Б.К., М.А.Ж. мен С.А.Б., ҰҚК уақытша ұстау изоляторына қамалды» деп хабарлады ведомство.

Топ қылмыстық идеология мен радикалды діни көзқарастарды қолдайтын тұлғалардан құралған. Тінту кезінде қолдан жасалған жарылғыш құрылғылардың құрамдас бөліктері, атыс қарулары, оқ-дәрілер, рациялар, броньдар, полиция киімдері, дрондар мен экстремистік әдебиеттер табылды.

Оқиғаға қатысы бар басқа адамдарды анықтау үшін қосымша тергеу амалдары жүргізілуде.