Масамен күреске 13,6 млрд теңге бөлінбек: Павлодар облысы әкімдігі бұған не дейді?

Павлодар облысында маса мен өзге де қансорғыш жәндіктермен күреске 13,6 млрд теңге жұмсау жоспарланып отыр. Бұл қаражат қоғамда сұрақ туғызған соң, Orda.kz тілшісі өңір әкімдігіне хабарласып, не себепті дәл осындай ірі қаражат қарастырылғанын сұрап білді.

Әкімдіктің жауабына сәйкес, алдағы уақытта бұл бағытта үш жылдық кезеңге арналған жаңа конкурс өткізу жоспарланып отыр.

«Сұрағыңызды түсіндім. Иә, алдағы уақытта жаңа конкурс өткізу жоспарланып отыр, ол үш жылдық кезеңге арналған. Осы мәселе бойынша келесі аптада кеңейтілген кеңес өтеді. Сол уақытқа дейін сәл күте тұруыңызды сұраймын. Кеңестен кейін сізге нақты әрі толық ақпаратты егжей-тегжейлі түрде ұсына аламын. Өйткені, белгілі бір өзгерістер болуы да мүмкін», — деп жауап берді әкімдік өкілдері.

Ведомство мәліметінше, конкурсты Жер қойнауын пайдалану басқармасы өткізеді. Алғашқы конкурс өтпей қалған, қазір екінші конкурс жарияланғанымен, ол әлі аяқталған жоқ.

Сондай-ақ келесі аптада өтетін кеңейтілген жиналыста өткен жылғы жұмыстардың қорытындылары, басқармалардың ұстанымдары мен алдағы жоспарлары талқыланбақ. Жиынға ғылыми қауымдастық өкілдері, экологтар, ғалымдар мен сала мамандары шақырылады.

Павлодар өңіріне не себепті масамен күреске үш жыл сайын қаражат бөлінеді?

Павлодар өңірінде жәндіктер мәселесі жыл сайын ушығады. Ертіс өзенінің жайылмасында көктемде уақытша су айдындары пайда болып, дәл сол жерлерде маса мен шіркейдің дернәсілдері жаппай көбейеді. Соның салдарынан жаз мезгілінде ауыл мен қала тұрғындары жәндіктерден қорғана алмай қиналады.

Бұрын қанша қаражат жұмсалған?

Алдыңғы жылдары да бюджет көлемі аз болмаған. 2023–2025 жылдарға арналған дезинсекция бойынша үш жылдық келісімшарттың құны шамамен 7,8 млрд теңге болған. Ал жекелеген маусымда бұл бағытқа 1 млрд теңгеден астам қаржы бөлінген кездер де болған. Алайда тұрғындар арасында «осынша ақша бөлінгенімен, нәтиже неге сезілмейді?» деген сұрақ жиі қойылады.

Бұл қаражат нақты неге жұмсалады?

• Әдетте мұндай жобалар аясында:
• Әуеден өңдеу жүргізіледі — ұшақтар батпақты аумақтар мен өзен маңына препарат шашады;
•  Өзендер мен су арналарына өңдеу жасалады — дернәсілдер шоғырланған жерлерге биологиялық құралдар төгіледі;
• Жерүсті және барьерлік өңдеу іске асады — елді мекендер, саябақтар, жағалаулар арнайы құрылғылармен залалсыздандырылады;
•  Кейбір жобаларда ғылыми сүйемелдеу мен мониторинг те қарастырылады.

Қоғам реакциясы:

Интернетте таралған ақпарат бойынша халық түрлі пікірлер қалдыруда. Тіпті араларында ащы шындықпен араластырып әзілге айналдырғандары да бар. Қысқаша айтқанда, қоғам реакциясы аралас — күдік, сын, әзіл және ақпараттық талдау қатар жүріп жатыр.

Orda.kz редакциясы конкурс нәтижелерін, шарттарын және бөлінетін қаражаттың нақты қалай жұмсалатынын бақылап отырады.