«Қазақтелеком» рекордтық дивидендтер төлемін жариялады

«Қазақтелеком» АҚ акциялары компания рекордтық жоғары дивидендтер төлеуді жариялағаннан кейін қайтадан қымбаттай бастады, деп хабарлады Orda.kz.       

KASE-де жарияланған ақпаратқа сәйкес, биыл «Қазақтелеком» 2024 жылға арналған дивидендтерді төлеуге өзінің таза кірісінің  барлығын дерлік — 74,1 млрд теңгені бағыттайды. Әр қарапайым акцияға төленетіні — 6741 теңге. Бұған қоса, алдыңғы жылдардың бөлінбеген пайдасынан да дивидендтер  — жалпы  219 млрд 256,9 млн теңге көлемінде төленеді. Осылайша, бір акцияға төленетін жалпы қаражат шамамен 26,7 мың теңге болады.

Осы шешімнен кейін, ақпанда «Мобайл Телеком-Сервис» ЖШС (ұялы байланыс операторлары Tele2 және Altel) сатылғаннан кейін күрт арзандаған «Қазақтелеком» акциялары қайтадан өсе бастады — бұл бүкіл Қазақстан қор нарығына оң әсер еткендей.

«Дивидендтер туралы бұрын-соңды болмаған жаңалық, «Қазақтелеком»  акциялары 1,3 %-ға өсіп, құлдырау тоқтады», деп атап өтті Қазақстан қаржыгерлер қауымдастығы.

Бұған дейін компанияның имиджіне ТМКК (АЗРК) анықтаған жоғары тарифтерге байланысты дау теріс әсер еткен еді.

Енді «Қазақтелеком» жоғары кірісті ашық көрсетіп,  жағдайды өз пайдасына өзгерте алады.

2024 жылы желтоқсанда «Қазақтелеком» АҚ филиалы – Сервистік фабрикасының лауазымды адамдары өкілеттіктерін асыра пайдаланды деген күдікке ілінген болатын.

2025 жылы қаңтарда «Қазақтелеком»  Altel мен Tele2 ресми түрде сатты. Брендтердің жаңа иесі катарлық Power International Holding конгломераты.