Кәуап пісіретін істікпен құрдасын өлтірген түлек: Мектеп директоры қызметінен босатылмайды

Оқу-ағарту министрі Ғани Бейсембаев Алматы облысындағы қайғылы оқиғаға байланысты мектеп әкімшілігіне қатысты көзқарасын айтты, деп хабарлайды Orda.kz.

 Оның сөзінше, қанша ауыр болғанымен, бұл қылмысқа мектеп ұжымы жауапты емес

«Қанды оқиға сол мектептің түлектеріне қатысты болғанымен, бұл — оқу орнының ішінде, сабақ уақытында болған жағдай емес. Сондықтан мектеп директоры мен сынып жетекшісін жұмыстан босатуға қарсымын. Олар қолдан келгенін жасады. Егер қылмыс мектеп қабырғасында болмаған болса, жауапкершілік ата-аналарда. Ата-аналар мен мұғалімдер бір-бірін кінәламай, керісінше, баланың қауіпсіздігі үшін бірігіп әрекет етуі керек», — деді министр.

Еске салсақ, Алматы облысында 11-сынып түлектерінің кеші қайғылы аяқталды. Кеш барысында бір түлек басқа бір түлекті шампурмен өлтірген. Марқұм жігіт қызды қорғау мақсатында араша түскен.