«Қаш» фильмінің операторы Қытайдағы беделді Golden Panda Awards сыйлығын иеленді

Қытайда өткен Golden Panda Awards 2025 халықаралық марапатында режиссер Айсұлтан Сейітов түсірген «Қаш» фильмі «Үздік операторлық жұмыс» жүлдесін жеңіп алды. Оператор Азамат Дулатовтың еңбегі жоғары бағаланды, деп хабарлайды Orda.kz.

Бұл жоғары марапат фильмнің бас операторы Азамат Дулатовтың еңбегіне беріліп отыр. Ол қазақ халқының тарихындағы ең ауыр кезеңдердің бірі — 30-жылдардағы ашаршылық қасіретін жарық пен көлеңкенің, композиция мен кадр тілінің көмегімен жеткізе алды. 

Байқауда әлемнің түкпір-түкпірінен келген танымал шеберлердің туындылары ұсынылды. Соған қарамастан, Дулатовтың жұмысы өзгелерден дараланып, халықаралық қазылар алқасының жоғары бағасына ие болды.

Премьерасы бірнеше жыл бұрын өткен «Қаш» фильмі әлі күнге дейін көрерменнің жүрегінен орын алып келеді. Ел ішінде де, шетелде де талай адамды мойындатты. Golden Panda Awards-тағы бұл жеңіс — тек шығармашылық топтың жетістігі ғана емес, сонымен бірге қазақ киносының қуатын, ұлттық өнер мектебінің биік мүмкіндігін айқын көрсеткен туынды болды.