Испания билігі Нұрсұлтан Назарбаевтың қызынан көшені қайтарып алды

Испания билігі Нұрсұлтан Назарбаевтың қызынан Льорет-де Мардағы көшені қайтарып алды. Назарбаевтар әулетінің вилласы жаяу жүргіншілер жолын жауып тастаған болатын, деп хабарлайды Orda.kz. 

2023 жылы вилланың жанына 100-ге жуық тұрғын наразылық білдіріп жиналды. Кейбірі қоршауды бұзды. Наразылық акциясына қатысушылар жаяу жүргіншілер жолын ашуды талап етті. Олар Каталония Жоғарғы сотына шағым түсірді. 2023 жылдың тамызында Каталонияның Жоғарғы соты Қазақстанның экс-президенті Нұрсұлтан Назарбаевтың отбасын жағалау жолы учаскесін ашуға міндеттеді. Назарбаевтың отбасына тиесілі Сan Juncadella вилласы туристердің соқпақ арқылы өтуіне кедергі келтірген. Бұл мүлік Назарбаевтың қызы Динара Құлыбаеваға тиесілі.

Испанияның БАҚ өкілдері 38 мыңнан астам тұрғыны бар Льорет-де-Мар қаласының тұрғындары 2007 жылдан бері бұл мәселемен күресіп келе жатқанын жазды. Әрі ол маңайда қарулы күзетшілер жүретіні хабарланды. Нәтижесінде Каталонияның Жоғарғы соты жаяу жүргіншілерге арналған жол учаскесін ашуға шешім қабылдады.

Айта кетейік, Динара Құлыбаеваға тиесілі ҚБТУ мемлекетке қайтарылды.

Еске сала кетсек, Orda.kz тұңғыш президенттің туған күні әрі Астана күні болған 6 шілдеде 30 жылда Назарбаев қалыптастырған жүйенің қазіргі қоғамға әсері жайлы саралап көрді. 2022 жылы Қаңтар оқиғасы кезінде 30 жыл бойы өнер туындылары, әдеби шығармалар, одалар, мақалалар, мадақтар арналған елбасы ықпалының іргетасы шайқалды. Оны Талдықорғандағы Назарбаевтың мүсінін наразы шерушілер ұрып-соғып, арқанмен асып қойғанда анық көрдік. Толығырақ материалымыздан оқыңыз.