Гүлнар Бажкенова: «Ордадағы» ахуал, Ақордадағы жанжал және Нью-Йорктегі «қосалқы алаң» туралы

Orda.kz басылымы мен оның бас редакторына қатысты жағдай ушығып тұрған шақта, әріптес журналистер Гүлнар Бажкеновадан сұхбат алуға ниет білдіріп жатыр. Бірі жай ғана қызығушылықпен, енді бірі жағдайдың мән-жайын түсініп, қолдау көрсету ниетімен.

Бұл жолы ол Вадим Дергачёв жүргізетін бағдарламаға қатысып, өз пікірін білдірді. Жүргізушінің сөзінше, Гүлнар Бажкенова — Қазақстан медиасаласындағы ең танымал әрі кейде қарама-қайшы пікір тудырып жүрген тұлғалардың бірі. Алайда қазіргі жағдайда ол қолдауға мұқтаж. Сол себепті оны студияға шақырғанын айтты.

Сұхбат барысында Бажкенова «Ордаға» ұсынылған бір миллион доллар, басылымды күшпен иемденуге тырысқан әрекет, билікпен арадағы қатынастар, Ақордадағы атышулы «пышақтасу», Дмитрий Шишкинмен арадағы плагиат ісі және Нью-Йорктегі «қосалқы ұшу алаңы» жайлы айтты.

Бағдарламада көтерілген басты мәселе — Қазақстанда сөз бостандығының бар-жоғы.

Анықтама:

2025 жылдың басында Гүлнар Бажкеноваға «Орда» басылымын «Сана» орталығына қосу жөнінде ұсыныс жасалған. Бірақ ол бұл ұсыныстан бас тартқан. Осыдан кейін редакцияға қысым күшейе түскен. Жағдай, әсіресе, ҰҚК қызметкерінің өз-өзіне қол жұмсауы туралы мақала жарық көргеннен соң күрделене түсті.

YouTube-тағы «Орда» шығарылымында Бажкенова соңғы айларда болған оқиғалар туралы ашық айтты. Ол жеке басына және редакция ұжымына көрсетілген қысым, бопсалау, жеке аккаунттарының бұзылуы мен қауіп-қатерлер туралы егжей-тегжейлі баяндады.

Гүлнар Бажкенова бірнеше халықаралық ұйым мен шетелдік дипломаттардың қолдауына ие екенін де атап өтті. Қазір Нью-Йоркте сот процесіне дайындық жүріп жатыр, себебі рейдерлік әрекетке қатысы бар компания АҚШ аумағында тіркелген.