Дональд Трамп екі «құдасын» лауазымды қызметке тағайындады

АҚШ президентін сайлауда Камала Харриске дес бермей, 50%-дық басымдықпен жеңген Трампты арнайы тағайындау рәсімі 2025 жылдың 20 қаңтарында болады. Ал президенттік өкілеттілігі біткелі тұрған Джо Байден өз ұлына рақымшылық жасады. Трамп та бұған дейін өз құдасына рақымшылық жасаған еді, деп хабарлайды Orda.kz.

Бұл жайлы қазақстандық саясаттанушы Ғазиз Әбішев өзінің Facebook парақшасында Трамптың кезінде құдасы Чарльз Кушнерге рақымшылық жасап, кейіннен оны Франциядағы елшісі етіп тағайындағаны жайлы жазба жариялады.

«АҚШ президенті Дональд Трамп та рақымшылық жасау құқығын пайдаланған еді. 2020 жылдың соңында, өз өкілеттігін аяқтауға жақындап қалған Трамп миллиардер Чарльз Кушнерге, яғни күйеу баласы — Джаред Кушнердің әкесіне рақымшылық жасады. Ол оның құдасы еді. Дональд пен Чарльз – құда, олардың балалары 15 жылдан астам уақыт бойы отбасы болып келе жатыр. Қазақтардың «Күйеу жүз жылдық, құда мың жылдық» деген мақалы бар. Жақында Дональд Трамп өзінің құдасы Чарльз Кушнерді Франциядағы АҚШ елшісі қызметіне тағайындайтынын жариялады» деп жазды Ғазиз Әбішев. 

Ол сондай-ақ тағы бір құдасын араб және Таяу Шығыс мәселелері бойынша аға кеңесшісі лауазымына тағайындағанын да айтты.

«Дональд Трамптың тағы бір құдасы бар. Екінші қызы Тиффани Трамп миллиардер Массад Булостың ұлы Майлға күйеуге шыққан. Дональд пен Массад та құдалар, олардың балаларының бас қосқанына екі жыл. Жақында Трамп өз құдасы Массад Булосты президенттің араб және Таяу Шығыс мәселелері бойынша аға кеңесшісі лауазымына тағайындайтынын мәлімдеді», — деп хабарлайды Orda.kz.

Ғазиз Әбішевтің айтуынша, бұл тағайындаулар Трамп саясатындағы отбасылық қарым-қатынастардың маңыздылығын көрсетеді, әрі сенімді серіктестерімен билігін нығайтып жатыр. 

Еске сала кетсек, Orda.kz Джо Байден өзінің «есірткі қолданып», «қару алған» ұлына рақымшылық жасағаны жайлы жазған еді.