Доллар бағамын 600-ге дейін болжауға болады – Байбазаров

Үкімет қаржыгерлер қауымдастығы болжамындағы теңгенің долларға шаққандағы 545,2-ге дейін әлсіреуі мүмкін деген пікірмен келіспейді, деп хабарлайды Orda.kz.

Бұл туралы премьер-министрдің орынбасары ұлттық экономика министрі Нұрлан Байбазаров айтты.

«Мен бұл болжамды оқыдым. Онда тұжырымдар анық емес. Геосаясатқа, төлем балансын және басқа да макроэкономикалық көрсеткіштерге сілтеме жасалған. Біз үшін ең маңызды көрсеткіштер, бәлкім, – экспорт деңгейі немесе ішкі нарықтағы валютаны сату деңгейі. Бұл өте маңызды. Біз осыны бақылап, жұмыс істейміз», – деді Байбазаров.

Сонымен қатар, министрлік пен ұлттық банк ішкі валюталық нарықтағы ұсынысты арттыру жөнінде шаралар қабылдап, қаржы реттеушісіне осы мәселе бойынша көмек көрсетуді жоспарлап отыр.

Сондай-ақ, Байбазаров билік тарапынан инвестиция тартуға бағытталған көптеген жоспар бар екенін еске салды. Келесі жылы негізгі инвестиция бюджеттік емес жеке көздер есебінен тартылатын болады.

«Ұлттық банк трансферттер мен валюталық интервенциялар арқылы қараша айында нарыққа 2 миллиард доллардан астам қаражат ұсынды. Сондықтан менің ойымша, осы шаралардың бәрі валюталық курсты ұстап тұруға көмектеседі, девальвацияның жеделдеуіне жол бермейді. Сондықтан біз көбірек нақты шаралар негізінде жұмыс істейміз. Ал болжамдарға келсек, ондай пікірлермен 600 теңгеге дейін жетуге болады. Мен бұл жай ғана сарапшылардың пікірлері деп санаймын, нарықта олар көп және әртүрлі», – деді министр

Айта кетейік, қаржыгерлер қауымдастығының сарапшылары 2025 жылы базалық мөлшерлеме, инфляция және доллар бағамы қандай болатынын болжады. Сарапшылардың пікірінше, ұлттық валюта бағамы шикізат бағаларының төмендеуіне байланысты 545,2 теңгеге дейін әлсіреуі мүмкін.