«Дәріні аузыма тығамыз деді». 4 баланың анасын күйеуі жындыханаға жатқызған

Түркістан облысында әйелінің аяқ-қолын скотчтап, достарымен бірге жындыханаға алып барған ер адамға сот үкімі шықты. Енді ол адам ұрлап, оны қинап жындыханаға жатқызаны үшін түрмеде 9 жыл отырады. Темір торға өзімен бірге сыбайлас болған достарын да ала кетті, деп хабарлайды Orda.kz.      

Түркістан қаласында екі жыл бұрын жаға ұстатарлық жағдай болған. 37 жастағы Дияра Ибрагимова үйімде жатқан жерімнен жолдасым аяқ-қолымды матап психикалық орталыққа алып кетті дейді. Жалғыз емес қасында екі досы болған. Шарасыз келіншек Шымкентке дейін қанша арпалысқанымен қашып құтыла алмаған. Орталыққа барғанда да ешкім араша түспеген. Онысы бейнекамераға да жазылған. 

«Орталықта үш күн жаттым. Маған дәрігерлер келіп, бір дәрі ұсынды. Ішпесең аяқ-қолыңды байлап, аузыңа тығамыз деген. Олар менің күйеуіммен алдына ала сөз байласқан деп күдіктенемін. Дәріні бірде иегіме, бірде саусағымның арасына тығып үлгердім. Күніне екі рет беретін. Екі адам жабылып қарап тұрғанда, бір жолы оны ішіп қойдым. Талмаусырап ұйықтап кеттім», — дейді Дияра Ибрагиова.  

Үшінші күні келіншек өз құқығын қорғау үшін адвокат жалдайтынын айтып, дәрігерге шағымданған. Осылайша жындыханадан құтылдым дейді 4 баланың анасы. Нағыз күрес бостандыққа шыққан соң басталған. Әйел қаншама рет полицияға арызданса да, іс екі рет қылмыстық құрам жоқ деген себеппен қысқартылыпты. Бірақ, қорлыққа шыдамаған Түркістан тұрғынын бұл тоқтатпаған. Тағы да арызданып, ақыры іс сотқа жетіп, күні кеше Түркістан қаласының ауданаралық соты үш ер адамға үкім кесті. 

«Қылмыстық құқықбұзушылық жиынтығымен онша қатаң емес жазаны неғұрлым қатаң жазаға ішінара қосу арқылы түпкілікті оған 9 жыл мерзімге бас бостандығынан айыру жазасы тағайындалсын. Жазаны қылмыстық атқару жүйесінің орташа қауіпсіз мекемелерінде өтеу тағайындалсын. Ибрагимовке қолданылған үйқамақ түріндегі бұлтартпау шарасы өзгертіліп, ол дереу сот залында қамауға алынсын»,  — деп үкімді Түркістан қаласы ауданаралық сотының судьясы Санжар Қойшыманов оқыды. 

Әйелін тәртіпке салмақ болған төрт баланың әкесі мен оның достарына прокурор 9 жылдан 10 жылға дейін бас бостандығынан айыру жазасын сұраған екен. Адам ұрлап, оны мәжбүрлеп психикалық диспансерге жатқызған Дияраның күйеуі 9 жылға сотталса, досына көмектесемін деп басы бәлеген қалған екеу енді 8 жылын түрмеде өткізеді. Үкіммен келіскен келіншек енді орталық дәрігерлерін сотқа беремін деп отыр. 

«Мен дәріні ішпеймін деп бас тартқан кезде мәжбүрлеп қазір байлап қойып ішкіземіз деді. Содан мен ішкен сияқты болып, дәріні жасырып, содан сау-аман қалдым. Егер дәріні ішкенде ол жерден шықпас едім. Алдағы уақытта психдеспансердегі дәрігерлер міндетті түрде дәл осы сотталушылар сияқты заң жүзінде жазаға тартылуы тиіс деп санаймын», — деді жәбіреленуші Дияра Ибрагимова.  

Айта кетейік сотталушы мен жәбірленушің ортақ 4 баласы бар. Кәмелет жасына толмаған перзенттері қазір Дияраның қарауында. Сот жәбірленушіге моральдық өтем ретінде  11 млн теңге төлеуді міндеттеді.

Еске салайық, Түркістан облысының психикалық орталығында екі жыл бұрын тағы бір сорақы оқиға тіркелген еді. 17 және 21 жастағы науқас қыздар мекеменің санитарлары зорлады деп шағымданған  еді. Жасы кәмелетке толмаған бойжеткеннің тіпті жүкті екені анықталды. Ақыры науқастарды қорлаған мекеме қызметкерлерінің әрқайсысы 15 жылдан бас бостандығынан айрылды. Екеуі де көпбалалы әке болатын.

Авторы: Назерке Еркінбекқызы, Түркістан облысы

Оқи отырыңыз:

• Шымкентте психикалық орталықта қыздарды зорлаған екі санитар 15 жылға сотталды
• Психикалық мекемеге жатқызылған ауытқуы бар бойжеткен емделудің орнына жүкті болды
• Ұят болса да айтайын: Психикалық орталықта зорланып бала көтерген қыздар өз шындығын айтты